जापानी प्रधानमन्त्री किशिदाद्धारा पार्टी नेताको चुनाव नलड्ने घोषणा
प्रकाशित मिति : श्रावण ३०, २०८१ बुधबार
जापानका प्रधानमन्त्री फुमियो किशिदाले पुन निर्वाचन नलड्ने घोषणा गर्नुभएको छ ।
सत्तारुढ लिबरल डेमोक्र्याटिक पार्टी (एलडीपी) को नेताका रुपमा पुनः निर्वाचन नलड्ने निर्णय किशिदाले गर्नुभएको बताइएको छ । यो संगै जापानले अब नयाँ प्रधानमन्त्री पाउने निश्चित भएको छ ।
पार्टीलाई नयाँ सुरुवात दिने उदेश्यले आफुले नयाँ निर्वाचन नलड्ने निर्णय गरेको ६७ वर्षीया किशिदाले बताउनु भयो । उहाँले सेप्टेम्बरमा पार्टीको नयाँ नेता चयन भएपछि प्रधानमन्त्री पदबाट राजीनामा दिने अपेक्षा गरिएको छ ।
उहाँको पार्टी भ्रष्टाचार र घोटालाको आरोपमा फसेको बेला किशिदाको समर्थन जापानमा पनि घट्दै गएको देखिएको छ ।
यसबाहेक किशिदा सरकारले बढ्दो मुद्रास्फीति, जापानी मुद्रा घट्ने जस्ता समस्या पनि सामना गरिरहेको छ ।
किशिदाको पार्टीमा पनि उहाँको नेतृत्वमा आमनिर्वाचन जित्ने हो कि होइन भन्ने शंका छ ।
निर्वाचन विश्लेषकहरूले बीबीसीलाई जापान अहिले पुस्ता परिवर्तनबाट गुज्रिरहेको र सत्तामा रहेको पार्टी आफ्नो छवि सुधार गर्न संघर्ष गरिरहेको बताएका छन ।