अमेरिकाको ओहायोमा नदीमा माछा मार्न गएका नेपाली भाषी गोपाल प्रधानको मृत्यु
प्रकाशित मिति : असार १०, २०८१ सोमबार
ओहायोको कोलेरिन टाउनसिपमा ग्रेट मायामी नदीमा माछा मार्न गएका नेपाली भाषी ५० बर्षीय गोपाल प्रधानको निधन भएको छ । आइतबार पानीमा डुबेको प्रधानको शव उद्धार टोलीले ३ घण्टाको खोजीपछि बाहिर निकाल्न सफल भएको थियो ।
उनी एकजना साथीसँग नदीको किनारमा माछा मार्दै थिए । त्यबी बेला पानीमा बाल्टी डुबेपछि उनी बाल्टी लिन पानीमा छिर्दा मृत्यु भएको जनाइएको छ । गोताखोरहरूले उनको शव माछा मार्ने मूल स्थानबाट नजिकै हेरिटेज पार्कनेर फेला पारेका थिए ।
घटनास्थलमा सबैभन्दा पहिले कोलरेन टाउनशिप फायर डिपार्टमेन्टका अधिकारीहरु पुगेका थिए । तर पछि धेरै विभागहरूबाट घटनास्थलमा पुगेका थिए । प्रहरी, आपतकालिन मेडिकल सर्भिस, उनीहरूको ड्रोन टोली र गोताखोर टोली घटनास्थलमा पुगेको थियो ।
सोमबार ह्यामिल्टन काउन्टी कोरोनरको कार्यालयले उनको नाम गोपाल प्रधान रहेको जनाएको हो । उनी भुटानी शरणार्थीका रुपमा नेपालबाट अमेरिका आएका थिए । उनी सिनसिनाटीमा आमा पत्नी, एक छोरी र तीन छोराका साथ बस्दै आएका थिए ।
घटना कसरी भयो भन्नुभन्दा धेरै सावधान रहन र सबै सुरक्षा सावधानीहरू अपनाउन अधिकारीहरुले सुझाव दिएका छन् । कुनै चीजलाई समात्ने तरिका खोज्न र जोखिम नलिन उनीहरुले सुझाव दिएका छन् ।
करिब एक वर्षअघि पनि एक टिनएजर उनको परिवारका साथमा नदी किनारमा खेलिरहेका बेला बेपत्ता भएका थिए। कैयन दिनको खोजीपछि उनको शव फेला पारिएको थियो ।