न्युयोर्कमा हराएका बृद्धलाई एक नेपालीले यसरी गरे उद्दार, बुबाआमाका खल्तीमा ठेगाना राख्न सुझाव


प्रकाशित मिति : असार ३, २०८१ सोमबार

न्युयोर्कमा आप्रवासी परिवारका बृद्ध बाबुआमाहरु बेलाबेलामा हराउने घटना नयाँ होइन । नेपाली बुबाआमाहरु भने न्युयोर्क सिटीमा हराउने घटनाहरु बेलाबेलामा सामने आइरहेका हुन्छन् । हालैमात्र न्युयोर्क सिटीको साउथ रिचमण्ड हिलमा बस्ने नेपाली बुबाआमा बाहिर निस्कदा बाटो बिराएपछि धेरै टाढा पुगेर हराएको घटना अझै ताजै छ । ती नेपाली बुबाआमालाई उक्त क्षेत्रमा बस्ने नेपाली समुदायको व्यापक खोजीपछि गुरुद्वारामा फेला पारिएको थियो ।

यस्तै घटना शुक्रबार पनि भएको छ । यसपटक हराएका बृद्ध बंगालादेशी रहेका थिए भने उनलाई उद्दार गरेका थिए एकजना नेपालीले । ७० बर्ष काटिसकेका ती बृद्ध उनको घरबाट बाहिर निस्कदा हराएपछि साउथ रिचमण्ड हिलमा रहेको राजेन्द्र गौतमको घरनेर आइपुगे । हराएर आत्तिएका ती बृद्धलाई देखेपछि गौतमले सोधीखोजी गरे । गौतमलाई बंगालादेशी भाषा समेत केहीमात्रामा बोल्न आउने भएकाले ती बृद्धसँग कुराकानी गर्न केही सहज भयो ।

हराएका बृद्धलाई उद्दार गरेर घरमा लगिदिने क्रममा राजेन्द्र गौतम

जमैकाको पाइन गु्रभमा छोराछोरीसँग बस्दै आएका ती बृद्ध हराएको अवस्थामा पाएपछि गौतमले उनलाई आफन्तको नम्बर र ठेगानाबारे सोधे । ती बृद्धले एउटा कागजमा घरको नम्बर लेखेर खल्तीमा राखेका रहेछन् । उक्त कागजमा फोन नम्बर भने बृद्धले आफ्नै राखेकाले गौतमले उनका परिवारलाई सम्पर्क गर्न भने सकेनन् । बरु आफै घरसम्म लगिदिने विचार गरे । त्यसपछि ती बृद्धलाई गौतमले आफ्नो गाडीमा राखेर उनको ठेगानामा लगेर छाडिदिए ।

बृद्धको उद्दारपछि राजेन्द्र गौतमले खसोखाससँग भने – ‘हाम्रा नेपाली बुबाआमाहरु पनि यसरी न्युयोर्कमा बेलाबेलामा हराउने घटना हुने गरेका छन् । यदि ती बृद्धको जस्तै नेपाली बुबाआमाका खल्तीमा पनि घरको ठेगाना र परिवारका सदस्को फोन नम्बर राखिदिने हो भने हराएको खण्डमा समेत बुबाआमालाई भेट्टाउन सहज हुने भएकाले अमेरिकामा रहेका आफ्ना अँगेजी नबोल्ने बुबाआमालाई बाहिर निस्कदा खल्तीमा सधै घरको ठेगाना र परिवारका सदस्यहरुको फोन नम्बर रहेको कागज राखिदिन सुझाव दिन चाहन्छु । ती बृद्धको पनि खल्तीमा ठेगाना नभएको भए उद्दारमा निकै कठिन हुनेथियो ।’

 

© 2024 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com