ओहायोमा नेपालीभाषी युवाले आफैलाई हाने गोली, एक्रोनमा दाहसंस्कार
प्रकाशित मिति : असार १, २०८१ शनिबार
अमेरिकाको ओहायोमा एक नेपाली भाषी व्यक्तिले आफैलाई गोली हानेर ज्यान लिएका छन् । ओहायोको समिट काउन्टीमा बस्दै आएका उद्धव कुमार विश्वले आफैले आफैलाई गोली हानेको जनाइएको छ ।
उनले बुधबार विहान ४ बजेतिर आफैलाई गोली हानेको र लगत्तै उनलाई मृत घोषणा गरिएको जनाइएको छ । उनी एक्रोनको योर्क स्ट्रीटमा बस्दै आएका थिए । घरको बेसमेन्टमा उनले आफैलाई गोली हानेको जनाइएको छ । ३९ बर्षीय उद्धव कुमार भुटानी शरणार्थीका रुपमा अमेरिका आएका थिए ।
भिमबहादुर विश्व र टिकामाया विश्वका छोरा उद्धवले के कारणले आफैलाई गोली हाने भन्ने प्रष्ट हुन सकेको छैन । २ छोरी र एक छोराका पिता उद्धव आफ्नी पत्नी श्रीजना विश्व र ९० बर्ष नाघेकी आमाका साथ बस्दै आएका थिए भने बुबा भिबहादुरको पहिले नै भुटानमा निधन भएको थियो ।
उद्धवका छोराछोरीहरु १३, ७ र ३ बर्षका छन् । उद्धवको स्ट्रोकका कारण एउटा खुट्टा नचल्ने भएपछि उनको खुट्टाको सर्जरी गरेको थियो । झण्डै चारमहिना अस्पतालमा बिताएपछि घर फर्केका उनी अलिअलि हिड्न थालेका थिए । बैसाखीको सहायतालेमात्र हिड्नसक्ने उनी समान्यतया गाडी चलाउन सक्ने भएपनि काममा भने जान सक्दैनथे ।
बृद्ध आमा, सानासाना छोराछोरी र आफ्नो यस्तो अवस्थाका कारण उनी निकै चिन्तित रहदै आएको जनाइएको छ । उनको शुक्रबार ओहायोको एक्रोनमा रहेको एडम्स मेसन फ्युनरल होममा दाहसंस्कार गरिएको छ ।
अमेरिकामा नेपाली र नेपालीभाषी समुदायमा पछिल्लो समयमा मानसिक स्वाथ्यको समस्या विकराल बन्दै गइरहेको छ । जसका कारण यस्ता घटनाहरुमा बृद्धि भइरहेका छन् ।