नेपाली क्रिकेटर लामिछानेलाई भिसादिन अमेरिकी दुतावासद्वारा पुन: अस्विकार
प्रकाशित मिति : जेष्ठ १७, २०८१ बिहीबार
अमेरिकी दूतावास काठमाडौंले नेपाली क्रिकेटर सन्दीप लामिछानेलाई भिसा दिन पुन अस्वीकार गरेको छ । यसअघि ९ जेठमा पनि दूतावासले सन्दीपलाई भिसा दिन अस्वीकार गरेको थियो ।
अन्तर्वार्ताका लागि बिहीबार साढे ४ बजे अमेरिकी दूतावास गएका उनलाई पुनः भिसा दिन अस्वीकार गरेको हो ।
फर्किने आधार नदेखिएको भन्दै सन्दीपलाई दोस्रो पटक भिसा नदिएको जनाइएको छ। सन्दीपले टी २० विश्वकप खेल्नुपर्ने भन्दै सरकारले भिसाका लागि अमेरिकी दूतावासमा पत्र पठाएको थियो ।
सन्दीपलाई अमेरिकाको भिसा दिनुपर्ने भन्दै बुधबार काठमाडौंको माइतीघरमा केही युवाहरुले प्रदर्शन पनि गरेका थिए । टी २० विश्वकप अमेरिका र वेष्ट इन्डिजमा आयोजना हुँदैछ । जसका लागि कप्तान रोहित पौडेलसहितको टिम यसअघि नै अमेरिका पुगिसकेको छ ।
२ जेठमा उच्च अदालत पाटनले बलात्कार मुद्दामा सफाइ दिएपछि नेपाल क्रिकेट संघ क्यान ले सन्दीपको निलम्बन फुकुवा गरेको थियो उनलाई विश्वकप खेल्न अमेरिका पठाउने निर्णय गरेको थियो ।
नेपाल क्रिकेट संघ क्यानले सरकारी तवरबाट आवश्यक सबै पहल हुँदा समेत अमेरिकाले क्रिकेटर सन्दीप लामिछानेलाई भिसा नदिएको बताएको छ ।
क्यानका सचिव पारस खड्काले बिहीबार एक विज्ञप्ति जारी गर्दै संयुक्त राज्य अमेरिका र वेस्ट इन्डिजमा संचालन हुन लागेको आइसिसी पुरुष टी– २० विश्वकप क्रिकेट प्रतियोगितामा सहभागिताका लागि अमेरिकी दूतावासले भिसा नदिएको औपचारिक जानकारी गराएका हुन् ।