कान्तिपुर पव्लिकेशनका अध्यक्ष सिरोेहिया बिरुद्ध पक्राउ पुर्जी जारी , पूर्वाग्रह राखेर कारवाही नगर्न कांग्रेसको चेतावनी
प्रकाशित मिति : जेष्ठ ८, २०८१ मंगलबार
धनुषा जिल्ला अदालतले कान्तिपुर पब्लिकेशनका अध्यक्ष कैलाश सिरोहियाविरूद्ध पक्राउ पुर्जी जारी गरेको छ । मंगलबार उहाँ विरुद्ध पक्राउ पुर्जी जारी भएको हो । जिल्ला अदालतका न्यायाधीश चित्रबहादुर गुरूङको इजलासले सिरोहियाका विरुद्ध पक्राउ पुर्जी जारी गर्न आदेश दिएको हो।
यसअघि सिरोहियाले दोहोरो नागरिकता लिएको भन्दै जिल्ला प्रहरी कार्यालय धनुषामा जाहेरी परेको थियो । सिरोहियाको नागरिकता नम्बर र अर्का एक व्यक्तिको नागरिकता नम्बर एउटै रहेको धनुषा प्रहरीले जनाएको थियो।
१६ वैशाख २०८१ मा प्रहरीमा परेको जाहेरीमा सिरोहिया गैरनेपाली नागरिक रहेको र नागरिकताको दुरुपयोग गरिरहेको आरोप थियो ।
सिरोहियाले आफूले २०३४ सालमा नागरिकता र २०५७ सालमा त्यसको प्रतिलिपि लिएको तर दुइटा नागरिकता नलिएको भन्दै विज्ञप्ति जारी गर्नुभएको थियो ।
कैलाश सिरोहियाले आफूविरूद्ध जाहेरी परेपछि सर्वोच्चमा प्रतिषेधको आदेश माग गर्दै रिटसमेत दायर गरेका थिए। उक्त रिटमा सुनुवाइ गर्दै सर्वोच्चले गृह मन्त्रालयसँग सिरोहियामाथि अनुसन्धान गर्नुपर्ने कारण माग गरेको थियो ।
प्रतिनिधि सभाको मंगलबार बसेको बैठकमा कान्तिपुर मिडिया ग्रुपका अध्यक्ष कैलाश सिरोहियालाई पक्राउ पुर्जी जारी भएकोबारे कुरा उठेको छ । बैठकमा नेपाली कांग्रेसका सह महामन्त्री तथा सांसद बद्री पाण्डेले सिरोहियाविरुद्धको पक्राउ पुर्जीबारे कुरा उठाउनु भएको हो ।
उहाँले राज्यका हरेक नागरिकलाई कानुनी दायरामा ल्याउन पाइने भएपनि आग्रह पूर्वाग्रह राखेर कसैमाथि कारबाही गर्न नपाइने बताउनु भयो । यदि त्यसभए कांग्रेस चुप लागेर नबस्ने उहाँले बताउनु भयो ।