पाल्पा र गुल्मीमा भएका दुर्घटनामा ३ जनाको मृत्यु , २ दर्जन घाइते
प्रकाशित मिति : जेष्ठ ३, २०८१ बिहीबार
पाल्पा र गुल्मीमा भएका दुर्घटनामा ३ जनाको मृत्यु भएको छ । २ दर्जन घाइते भएका छन् ।
पाल्पाको निस्दी गाउँपालिका–४ मतियारडाँडास्थित भित्री कच्ची सडक खण्डमा आरूघाट खोलाबाट खादर जाँदै गरेको लु १ ज ३३२४ नम्बरको जिप सडकबाई अन्दाजी ३० मिटर तल खस्दा २ जनाको मृत्यु भएको छ । १३ जना घाइते भएका छन । घाइतेहरू सबै निस्दी गाउँपालिका–४ का हुन ।
दुर्घटनामा परी पाल्पाको निस्दी गाउँपालिका–४ का ६ वर्षीय राजिब सुनारी र २० वर्षीय तेजन सोमाईको मृत्यु भएको जिल्ला प्रहरी कार्यालय पाल्पाका सूचना अधिकारी डिएसपी सुगन्ध श्रेष्ठले जानकारी दिनु्भयो । तेजनको उपचारका क्रममा नवलपरासीको मध्यविन्दु अस्पतालमा मृत्यु भएको हो ।
घाइतेहरू मध्ये केहीको नारायणी सामुदायिक अस्पताल, चितवन मेडिकल कलेज र मध्यविन्दु अस्पतालमा उपचार भइरहेको पाल्पा प्रहरीले बताएको छ ।
यस्तै गुल्मीमा भएको बस दुर्घटनामा सहचालकको मृत्यु भएको छ । पोखराबाट गुल्मी तम्घासका लागि छुटेको लु १ ख ८१७५ नम्बरको बस रिडीमा दुर्घटना हुँदा बसका सहचालक ४० वर्षका युवराज कुँवरको मृत्यु भएको हो ।
कुँवरको पाल्पास्थित लुम्बिनी मेडिकल कलेजमा उपचारका क्रममा मृत्यु भएको जिल्ला प्रहरी कार्यालय गुल्मीका प्रहरी नायब उपरीक्षक शंकर पोखरेलले बताउनु भएको छ ।
रुरुक्षेत्र गाउँपालिका –१ मक्वादीस्थित रिडी–तम्घास पक्की सडक खण्डमा भएको दुर्घटनामा अन्य १२ जना घाइते भएका छन । घाइते सबैको पाल्पामा उपचार भइरहेको छ । बस सडकबाट अन्दाजी ५० । ६० मिटर तल खसेको गुल्मी प्रहरीले बताएको छ ।