सरकारले आगामी बर्षको नीति कार्यक्रम संसदमा पेश गर्ने , होला त कांग्रेसको सहयोग ?
प्रकाशित मिति : बैशाख ३१, २०८१ सोमबार
सरकारको आगामी आर्थिक वर्ष २०८१।८२ को नीति तथा कार्यक्रम पेश हुदैछ ।
संघीय संसद्को संयुक्त बैठकमा आगामी आर्थिक वर्ष ०८१।८२ को नीति तथा कार्यक्रम पेस हुन लागेको हो । त्यसका लागि मंगलवार मध्यान्ह ३ बजेका लागि संयुक्त बैठक बोलाइएकोछ ।
उक्त बैठकमा सरकारका तर्फबाट राष्ट्रपति रामचन्द्र पौडेलले नीति तथा कार्यक्रम प्रस्तुत गर्ने कार्यसूची रहेको संघीय संसद सचिवालयले जनाएको छ । नीति तथा कार्यक्रममाथि प्रतिनिधिसभा र राष्ट्रिय सभामा छुट्राछुट्टै छलफल गरिने छ ।
प्रतिनिधिसभा बैठकमा जेठ ३, ४, ६, ७, ८ र ९ गते छलफल हुने र अन्तिम दिन पारित गर्ने कार्यसूची रहेको संसद् सचिवालयले जनाएको छ ।
त्यसैगरी राष्ट्रिय सभामा भने जेठ ३, ४ र ६ गते सरकारको नीति तथा कार्यक्रममाथि छलफल हुनेछ । त्यसपछि सरकारले आगामी वर्षको बजेट जेठ १५ मा ल्याउनै पर्ने संवैधानिक व्यवस्था रहेको छ ।
तर संसद्को गतिरोध अन्त्य गर्ने विषयमा दलहरुका आ–आफ्नै अडानले मंगलबार पेश हुने नीति तथा कार्यक्रम नै प्रभावित हुने जोखिम देखिएको छ ।
सहकारी ठगी प्रकरणमा संसदीय छानबिन समिति गठन गर्नुपर्ने प्रमुख प्रतिपक्षी नेपाली कांग्रेसको मागका कारण सदन दुई महिनादेखि अवरुद्ध छ । सोमबार दिनभरजसो भएका छलफल निष्कर्षमा नपुगेपछि मंगलवार बिहानैबाट थप गृहकार्यमा नेताहरु जुटेका छन् ।