उपनिर्वाचन : इलाम एमालेले जोगायो , बझाङ कांग्रेसले गुमायो , रास्वपाको जमानत नै जोगिएन
प्रकाशित मिति : बैशाख १७, २०८१ सोमबार
इलाम क्षेत्र नम्बर २ र बझाङमा नेकपा एमालेका उम्मेदवारहरु विजयी भएका छन । प्रतिनिधिसभा तर्फ इलाम २ र प्रदेशसभा तर्फ बझाङ १ क मा शनिबार उपनिर्बाचन भएको थियो । निर्बाचन आयोगका अनुसार इलाम २ मा एमालेका सुहाङ नेम्वाङ २७ हजार ७७२ मत ल्याएर विजयी हुनुभयो ।
उहाका निकटतम प्रतिस्पर्धी नेपाली कांग्रेसका डम्बरबहादुर खड्काले २१ हजार ९४२ मत पाउनुभयो । नेम्वाङले खड्कालाई ५ हजार ८३० मतान्तरले पराजित गर्नुभएको छ । सो निर्बाचन क्षेत्रमा पहिचान पक्षधर भनेर चिनिएका स्वतन्त्र उम्मेदवार डकेन्द्रसिंह लिम्बू थेगिम ले ११ हजार ४५७ मत प्राप्त गर्दै तेश्रो हुनुभएको छ ।
चौथो स्थानमा राष्ट्रिय स्वतन्त्र पार्टीका उम्मेदवार मिलन लिम्बूले ५ हजार ५० मत प्राप्त गर्नुभयो । कुल सदर मतको १० प्रसितसत नल्याएका कारण लिम्बु सहित १६ जनाको जमानत नै जफत भयो ।
इलाम–२ मा अघिल्लोपटक १ लाख १५ हजार ४६७ मतदाता रहेका थिए। यसपटक १ लाख १५ हजार ८८९ मतदाता रहेका थिए। इलाममा यसपटक ५९ दशमलव ८६ अर्थात् ६९ हजार ३७४ मत खसेको थियो। जसमध्ये ६८ हजार ४७२ सदर र ९०२ मत बदर भएको थियो।
२०७९ मा भएको प्रतिनिधि सभा चुनावमा इलाम २ मा एमाले उम्मेदवार सुवास नेम्वाङले ३० हजार २० मत ल्याएर निर्वाचित हुनुभएको थियो । संबिधान सभाका अध्यक्ष समेत रहेका सुवास नेम्वाङको निधन भएपछि भएको उपनिर्बाचनमा एमाले ले सुवासका छोरा सुहाङलाई उम्मेदवार बनाएको थियो ।
२०७९ मा भएको चुनावमा सत्ता गठबन्धनका उम्मेदवार रहनु भएका कांग्रेसका डम्बर खड्काले २९ हजार ९ सय ६ मत गर्नु भएको थियो । अहिलेको उपनिर्बाचनमा एमाले उम्मेदवार सुहाङलाई माओवादी केन्द्र र नेत्र बिक्रम चन्द बिप्लव नेतृत्वको नेकपाले पनि सघाएका थिए । कांग्रेस भने एक्लै प्रतिश्पर्धा गरेको थियो ।
बझाङमा एमालेका भण्डारी विजयी
बझाङ प्रदेशसभा १ मा नेकपा एमालेका दमनबहादुर भण्डारी बिजयी हुनुभएको छ । नेपाली कांग्रेसका अभिषेकबहादुर सिंहलाई २ सय ६७ मतको अन्तरले पराजित गर्दै भण्डारी प्रदेशसभा सदस्यमा निर्बाचित हुनुभएको हो ।
अन्तिम मत परिणाम अनुसार भण्डारीले ११ हजार ६ सय १३ मत पाउदा निकटतम् प्रतिस्पर्धी नेपाली कांग्रेसका अभिषेकबहादुर सिंहले ११ हजार ३ सय ४६ मत प्राप्त गर्नुभयो ।
नेकपा माओवादी केन्द्रका जनकबहादुर बुढाको ३ हजार ९ सय ६७ मत पाउँदा नेकपा एकीकृत समाजवादीका दिलबहादुर सिंहले २ हजार ५ सय १३ मत प्राप्त गर्नु भएको छ । त्यहाँ ११ जना उम्मेदवार प्रतिस्पर्धामा रहेका थिए ।
यो क्षेत्रमा २०७९ को चुनावमा कांग्रेसले जितेको थियो । त्यसबेला कांग्रेसका पृथ्वीबहादुर सिंहले निकटतम प्रतिस्पर्धी एमालेका अफिलाल ओखेडालाई ३ हजार ७ सय ३६ मतले पछि पार्दै विजयी हुनुभएको थियो । प्रदेशमन्त्री रहेकै बेला सवारी दुर्घटनामापरी सिंहले ज्यान गुमाएपछि भएको उपनिर्वाचनमा कांग्रेसले उहाँकै छोरालाई टिकट दिएको थियो ।
बझाङ–१ को प्रदेश सभा उपनिर्वाचनमा नेकपा एकीकृत समाजवादी सहित ८ जना उम्मेदवारको धरौटी जफत भएको छ।
सोमबार दिउँसो सकिएको मत गणनाअनुसार एकीकृत समाजवादीका उम्मेदवार दिलबहादुर सिंहले २५१४ मत प्राप्त गर्नु भएको छ। जबकि यो क्षेत्रमा जमानत जोगाउन उम्मेदवारले २ हजार ९७० मत ल्याउनुपर्ने थियो। बझाङमा २९ हजार ७०५ मत सदर भएको थियो।