प्यालेष्टाइन समर्थक प्रदर्शनमा उत्रिएका विद्यार्थीहरु कोलम्बिया युनिभर्सिटीबाट निलम्बन, अरुको पहिचान गरिने
प्रकाशित मिति : बैशाख ६, २०८१ बिहीबार
न्युयोर्कको कोलम्बिया युनिभर्सिटीले क्याम्पसको मर्निङसाइड हाइट्समा प्रदर्शनमा उत्रिएका प्यालेष्टाइन समर्थक कैयन विद्यार्थीहरुलाई युनिभर्सिटीबाट निलम्बन गरेको छ । प्रदर्शनमा उत्रिएका कम्तिमा तीन विद्यार्थीहरुलाई निलम्बन गरिएको छ, जसमा मिनिसोटाका सांसद इल्हान ओमारकी छोरी इसरा हिर्सी समेत रहेको जनाइएको छ ।
अनधिकृत प्रदर्शनहरुमा भाग लिने विद्यार्थीहरूलाई निलम्बन गरिएको कोलम्बिया युनिभर्सिटीले जनाएको हो । त्यस्ता विद्यार्थीहरुको पहिचान जारी राख्ने र आगामी दिनमा पनि निलम्बनका औपचारिक सुचनाहरु पठाउने युनिभर्सिटीको भनाई छ ।
बिहिबार बिहान प्रदर्शनको क्रममा धेरै व्यक्तिहरूलाई पक्राउ गरिएको थियो । तर कतिजनालाई पक्राउ गरियो भन्नेबारे प्रहरीले केही खुलाएको छैन । तर बिहिबार विहान युनिभर्सिटीको गेटबाट कम्तीमा ५ जनालाई पक्राउ गरिएको थियो ।
कोलम्बिया युनिभर्सिटीका सयौं विद्यार्थीहरूले दर्जनौं पालहरू खडा गरेर बुधबार बिहान ४ बजेदेखि म्याराथन विरोध सुरु गरेका थिए । ब्रोडवेबाट क्याम्पसमा सार्वजनिक पहुँच अझै पनि अवरुद्ध रहेको छ । प्रर्दशनकारीहरु विरोध समर्थकहरू वेष्ट ११६ स्ट्रीटमा युनिभर्सिटीको गेट बाहिर सुतेका थिए ।
इजरायलसँग सम्बन्धबाट कोलम्बिया युनिभर्सिटी अलग नभएसम्म प्रदर्शन जारी राख्ने प्रदर्शनकारीहरुको योजना रहेको छ । उनीहरुले नरसंहारमा संलग्न कम्पनीहरूबाट युनिभर्सिटी अलग हुनुपर्ने, कोलम्बियाको लगानीको पारदर्शिता हुनुपर्ने र मारमा परेका सबै विद्यार्थीहरूको लागि पूर्ण माफी हुनुपर्ने लगायतका माग गरेका छन् ।