अमेरिकी राष्ट्रपति बाइडेनको ट्याक्स फाइल सार्वजनिक, कति कमाए २०२३ मा ?
प्रकाशित मिति : बैशाख ५, २०८१ बुधबार
अमेरिकी राष्ट्रपति जो बाइडेन र प्रथम महिला जिल बाइडेनले आफ्नो ट्याक्स फाइलको कागजात सार्वजनिक गरेका छन् । ट्याक्स फाइल गर्ने अन्तिम मितिमा जारी गरेको संयुक्त ट्याक्स रिटर्न अनुसार बाइडेन दम्पत्तिले सन् २०२३ मा ६ लाख १९ हजार ९ सय ७६ डलर कमाएका छन् भने संघीय करबापत १ लाख ४६ हजार ६ सय २९ डलर तिरेका छन् । दम्पत्तिले २३ दशमलव ७ प्रतिशत संघीय कर दर भुक्तान गरेका छन् ।
बाइडेनले आफ्नो जीवनमा संघीय ट्याक्स रिटर्न सार्वजनिक गरेको यो २६ औं वर्ष हो। पूर्व राष्ट्रपति डोनाल्ड ट्रम्पले भने ट्याक्स फाइलका कागजातहरू सार्वजनिक गर्न अस्वीकार गरेका छन् । राष्ट्रपतिहरूको संघीय ट्याक्स फाइलका कागजात सार्वजनिक गर्ने परम्परा समेत उनले तोडेका थिए ।
अमेरिकी जनतासँग पारदर्शी हुने आफ्नो प्रतिबद्धतालाई फेरि एक पटक देखाउँदै राष्ट्रपति बाइडेनले ट्याक्स फाइलका कागजात सार्वजनिक गरेको ह्वाइट हाउसले एक विज्ञप्तिमा बताएको छ । बाइडेन दम्पत्तिको आम्दानी सन् २०२२ को तुलनामा बढेको छ । उक्त बर्ष उनीहरुको आम्दानी ५ लाख ७९ हजार ५१४ डलर रहेको थियो ।
सन् २०२३ मा बाइडेनले राष्ट्रपतिको तलबका रुपमा ४ लाख डलर कमाएका छन् । जिल बाइडेनले नर्दन भर्जिनिया कम्युनिटी कलेजमा पढाएबापत ८५ हजार ९ सय ८५ डलर कमाएकी छिन् ।
बाइडेन दम्पत्तिले कर योग्य ब्याज, पेन्सन, सोसल सेक्युरिटीलाभ लगायतबाट १ लाख २९ हजार ८ सय ७६ डलर कमाएका छन् । जिल बाइडेनले अघिल्लो पुस्तक प्रकाशनहरूबाट रोयल्टीमा ४ हजार १ सय १५ डलर कमाएकी छिन् ।
बाइडेन दम्पत्तिले स्वर्गीय छोराको नाममा नाममा रहेको ब्यु बिडेन फाउन्डेशनलाई ५ हजार डलरसहित १७ वटा परोपकारी संस्थालाई २० हजार ४ सय ७७ डलर डोनेशन गरेका छन् । बाइडेन दम्पत्तिले डेलावेयर राज्यमा आयकर स्वरुप ३० हजार ९ सय ८ डलर तिरेका छन् । जिल बिडेनले भर्जिनियामा पनि ३ हजार ५ सय ४९ डलर कर तिरेकी छिन् ।
यसैबीच उपराष्ट्रपति कमला ह्यारिस र पति डग एमहोफले २०२३ मा संघीय आयकरमा ८८ हजार ५ सय ७० डलर तिरेको रिपोर्ट गरेका छन् । यो दम्पत्तिले सन् २०२३ मा ४ लाख ५० हजार २ सय ९९ डलर कमाएका थिए । उनीहरुले संघीय कर १९ दशमलव ७ प्रतिशतका दरले तिरेका छन् । उनीहरुले २३ हजार २६ डलर डोनेशन समेत गरेका छन् ।