न्युयोर्क सिटीका उत्कृष्ट १०० रेष्टुरेण्टको सूची न्युयोर्क टाइम्समा, क्वीन्सको उत्कृष्टमा चेली रेष्टुरेण्ट
प्रकाशित मिति : चैत्र २८, २०८० बुधबार
न्युयोर्क टाइम्सले न्युयोर्क सिटीका उत्कृष्ट १०० रेष्टुरेण्टको सूची सार्वजनिक गरेको छ । जसमा म्यानहटनका ६७, ब्रुकलिनका २०, क्वीन्सका १७, ब्रोंक्सका ४ र स्टेटन आइल्याण्डका ३ वटा रेष्टुरेण्टहरु परेका छन् । क्वीन्सका उत्कृष्ट रेष्टुरेण्टहरुमा एउटामात्र भारतीय रेष्टुरेण्ट परेको छ भने ३ वटा चाइनिज रेष्टुरेण्टहरु परेका छन् । क्वीन्सको उत्कृष्टमा चेली रेष्टुरेण्ट परेको छ । न्युयोर्कको इस्ट भिलेज र फ्लशिंगमा रहेको यो रेष्टुरेण्ट चाइनिज रेष्टुरेण्ट हो ।
न्युयोर्क सिटीमा ३ दर्जनभन्दा धेरै नेपालीबाट संचालित वा नेपाली खाना उपलब्ध रेष्टुरेण्टहरु रहेतापनि उत्कृष्ट सूचीमा भने कुनै पनि नेपालीबाट संचालित वा नेपाली खाना उपलब्ध रेष्टुरेण्टहरु परेका छैनन् । भारतीय रेष्टुरेटमा ग्रिनवीच भिलेजमा सेमा उत्कृष्टमा परेको छ भने टप १०० को सूचीमा यो ७ नम्बरमा परेको छ । क्वीन्समा भने फ्लशिंगमा रहेको टेम्पल क्यान्टिन उत्कृष्ट भारतीय रेष्टुरेण्टमा परेको छ ।
यो सूची रेस्टुरेन्ट समीक्षक पीट वेल्सद्वारा संकलित गरिएको थियो, जसले २०१२ देखि न्युयोर्क टाइम्सका लागि खानाको बारेमा लेख्दै आएका छन्। उनले प्रवद्र्धनका लागि रकम नभएका रेष्टुरेण्टहरुलाई समीक्षाको प्राथमिकता दिदै आएका छन् । क्वीन्समा रहेका कैयन नेपाली रेष्टुरेण्टहरुको न्युयोर्क टाइम्समा समेत समीक्षा आउने गरेतापनि उनीहरुले उत्कृष्टको सूचीमा पार्न भने सकेका छैनन् ।
नेपाली रेष्टुरेण्टहरुमा मम निकै लोकप्रिय रहदै आएको छ । यो नेपालीबाहेकले समेत मन पराउने परिकारका रुपमा रहदै आएको छ । क्वीन्समा नेवारी स्वादका रेष्टुरेण्टहरु पनि लोकप्रिय छन् भने नियमित रेष्टुरेण्टहरुले पनि नेवारी खानाका स्वाद पस्किने गरेका छन् । तर उत्कृष्टमा पर्नका लागि भने अब नेपाली रेष्टुरेण्टहरुले आफ्नो गुणस्तर बृद्धि गर्नुपर्ने बेला भएको छ ।
न्युयोर्क टाइम्समा प्रकाशित टप १०० रेष्टुरेण्टको सूची हेर्न यहाँ क्लीक गर्नुहोला ।