अमेरिकी सिनेटर बर्नी स्याण्डर्सको कार्यालयमा आगो लगाउने संदिग्ध पक्राउ
प्रकाशित मिति : चैत्र २५, २०८० आईतबार
सिनेटर बर्नी स्यान्डर्सको भर्मन्ट कार्यालयमा आगलागीको सम्बन्धमा आइतवार एक संदिग्धलाई पक्राउ गरिएको डिपार्टमेन्ट अफ जस्टिसले जनाएको छ । विगतमा माइकल सोगोमोनियन भनेर चिनिने क्यालिफोर्नियाको नर्थरिजको ३५ वर्षीय शान्त सोघोमोनियनलाई बर्लिङ्टन, भर्मन्टमा स्यान्डर्सको कार्यालय रहेको भवनलाई क्षति पुर्याउन आगो लगाएको आरोपमा आइतवार पक्राउ गरिएको हो ।
सोघोमोनियन शुक्रबार बिहान भवनमा प्रवेश गरेर स्यान्डर्सको बर्लिंगटन कार्यालय रहेको तेस्रो तल्लामा गएको अदालतको रेकर्डमा जनाइएको छ । संदिग्ध व्यक्तिले कार्यालयको बाहिरी ढोका नजिकै तरल पदार्थ छर्केको भिडियोमा देखिएको छ । हातमा समातिएको लाइटरले आगो लगाएको जनाइएको छ ।
आगोले स्यान्डर्सको कार्यालय र वरपरका क्षेत्रहरूको ढोकाको बाहिरी भागमा क्षति गरेको थिषे । आगलागीको समयमा स्यान्डर्सका धेरै कर्मचारीहरू कार्यालयमा थिए तर घटनाको क्रममा उनीहरूलाई शारीरिक चोट भने लागेको थिएन । त्यस समयमा भवनमा रहेका अन्य व्यक्तिको संख्या भने अज्ञात रहेको छ, तर कुनै चोटपटक रिपोर्ट गरिएको छैन।
आगलागीपछि उक्त भवनमा शुक्रबार अग्निनियन्त्रकहरूलाई पठाइएको थियो। तिनीहरूले लिफ्ट र स्यान्डर्स कार्यालयको प्रवेशद्वारको बीचमा रहेको भेस्टिबुलमा आगोलागेको फेला पारेका थिए ।
अमेरिकी मजिस्ट्रेट न्यायाधीश केभिन जे डोयल समक्ष सोगोमोनियनको प्रारम्भिक उपस्थिति अझै तय गरिएको छैन। उनी दोषी प्रमाणित भएमा पाँच देखि २० वर्षको जेल सजाय हुनेछ भने अधिकतम २ लाख ५० हजार जरिवानाको सामना गर्नुपर्नेछ।
८२ वर्षीय स्यान्डर्स सिनेटको तेस्रो कार्यकालमा छन् । उनले त्योभन्दा पहिले १६ वर्ष प्रतिनिधिसभा सदस्यका रुपमा सेवा गरेका थिए । त्यो भन्दा पहिले उनी बर्लिंगटनको मेयर थिए, जहाँ उनी आफ्नी श्रीमतीसँग बस्छन्।