भूकम्पको १ घण्टापछि न्युजर्सीको बेडमिनिष्टर नजिक केन्द्रबिन्दु बनाएर गयो पराकम्प
प्रकाशित मिति : चैत्र २३, २०८० शुक्रबार
मुख्य भूकम्पको झण्डै १ घण्टापछि न्युजर्सीको बेडमिनिष्टर नजिक केन्द्रबिन्दु बनाएर पराकम्प गएको युएस जियोलोजिकल सर्भेले जनाएको छ । तर यो पराकम्प जम्मा २ रेक्टर स्केलको भएकाले धेरैले अनुभव नगरेको जनाइएको छ । पराकम्प ११ बजेर २० मिनेटमा गएको जनाइएको छ ।
न्युयोर्क सिटीले भूकम्प गएको झण्डै ४० मिनेटपछि ११ बजेर २ मिनेटमा सिटीका बासिन्दाहरुको फोनमा अलर्ट पठाएको थियो । आपतकालिन अवस्थामा जवाफ दिनमा ढिलो गर्दै आएको आलोचना खेप्दै आएको न्युयोर्क सिटीले अलर्ट पठाउन गरेको ढिलाइको पनि आलोचना भएको छ । त्यस्तै पराकम्प जानसक्ने अलर्ट पनि पराकम्प गएको झण्डै २५ मिनेटपछि पठाएको थियो ।
न्युयोर्क सिटी इमर्जेन्सी म्यानेजमेन्टले खतरामा भएको भएमा मात्र ९११ मा फोन गर्न र आपतकालिन अवस्थाबाहेक अन्य रिपोर्ट गर्न ३११ मा फोन गर्न सुझाव दिएको छ । साथीहरु र परिवारलाई आफ्नो अवस्थाबारे जानकारी दिन सुझाव दिइएको छ, किनभने यसबाट तपाईं ठीक भए नभएकोबारे जानकारी हुनेछ । फोन लाइनहरू व्यस्त हुनसक्ने भएकाले टेक्स्ट मेसेजहरु पठाउन सुझाव दिइएको छ ।साथै आफ्ना छिमेकीहरुको अवस्था ठीक भए नभएको जाँच गर्न सुझाव दिइएको छ ।
आजविहान १० बजेर २३ मिनेटमा न्युयोर्क सिटीमा भूकम्पको धक्का महसुस भएको हो । युएस जियोलोजिकल सर्भेका अनुशार उक्त भूकम्प न्युजर्सीको ह्वाइटहाउस स्टेशनबाट ७ किलोमिटर उत्तरपूर्वमा केन्द्रबिन्दु भएर गएको थियो ।
भूकम्पबाट कुनै क्षति र चोटपटक नभएको न्युयोर्क प्रहरीले जनाएको छ । सुनामीबारे कुनै चेतावनीहरु पनि जारी गरिएको छैन । न्युयोर्क सिटीमा यस्तो भूकम्प दुर्लभ मानिने भएकाले स्थानीयबासिहरु त्रसित भएका छन् ।