न्युयोर्क सिटीको आपतकालिन अलर्ट : थप पराकम्पहरु आउनसक्ने चेतावनी
प्रकाशित मिति : चैत्र २३, २०८० शुक्रबार
४ दशमलव ८ रेक्टर स्केलको भूकम्पपछि न्युयोर्क सिटीले थप आपतकालिन अलर्टहरु जारी गर्दै पराकम्पहरु आउनसक्ने चेतावनी दिएको छ । तर न्युयोर्कबासीहरुले आफ्ना नियमित गतिविधिहरु जारी राख्न सक्ने अलर्टमा उल्लेख गरिएको छ । युएस जियोलोजिकल सर्भेले पनि कम्तीमा एउटा पराकम्प आउनसक्ने अनुमान गरेको छ ।
न्युयोर्क सिटीले न्युयोर्कका बासिन्दाहरुलाई घरभित्र बस्न सुझाव दिएको छ भने कोही घाइते भएमा ९११ मा फोन गर्न सुझाव दिइएको छ । उक्त आपतकालिन अलर्टहरु स्थानीयबासिन्दाका फोनहरुमा पठाइएको थियो ।
त्यस्तै न्युयोर्क सिटी इमर्जेन्सी म्यानेजमेन्टले खतरामा भएको भएमा मात्र ९११ मा फोन गर्न र आपतकालिन अवस्थाबाहेक अन्य रिपोर्ट गर्न ३११ मा फोन गर्न सुझाव दिएको छ । साथीहरु र परिवारलाई आफ्नो अवस्थाबारे जानकारी दिन सुझाव दिइएको छ, किनभने यसबाट तपाईं ठीक भए नभएकोबारे जानकारी हुनेछ । फोन लाइनहरू व्यस्त हुनसक्ने भएकाले टेक्स्ट मेसेजहरु पठाउन सुझाव दिइएको छ ।साथै आफ्ना छिमेकीहरुको अवस्था ठीक भए नभएको जाँच गर्न सुझाव दिइएको छ ।
आजविहान १० बजेर २३ मिनेटमा न्युयोर्क सिटीमा भूकम्पको धक्का महसुस भएको हो । युएस जियोलोजिकल सर्भेका अनुशार उक्त भूकम्प न्युजर्सीको ह्वाइटहाउस स्टेशनबाट ७ किलोमिटर उत्तरपूर्वमा केन्द्रबिन्दु भएर गएको थियो ।
भूकम्पबाट कुनै क्षति र चोटपटक नभएको न्युयोर्क प्रहरीले जनाएको छ । सुनामीबारे कुनै चेतावनीहरु पनि जारी गरिएको छैन । न्युयोर्क सिटीमा यस्तो भूकम्प दुर्लभ मानिने भएकाले स्थानीयबासिहरु त्रसित भएका छन् ।
भूकम्पको धक्का न्युयोर्क, न्युजर्सी र कनेक्टिकटसम्म अनुभव गरिएको थियो । न्यु जर्सीदेखि लङ आइल्याण्डसम्म भवनहरू हल्लिएका रिपोर्टहरू आएका छन् । न्युयोर्क गभर्नर क्याथी होकुल र न्युयोर्क सिटीका मेयर एरिक एडम्सलाई भूकम्पबारे जानकारी दिइएको छ।