न्युयोर्क सिटी क्षेत्रमा आजको भूकम्प १४० बर्षको इतिहासमा सबैभन्दा ठूलो
प्रकाशित मिति : चैत्र २३, २०८० शुक्रबार
न्युयोर्क सिटी क्षेत्रमा आज आएको भूकम्प १४० बर्षको इतिहासमा सबैभन्दा ठूलो भएको जनाइएको छ । कोलम्बिया युनिभर्सिटीको तथ्यांक अनुशार सन् १८८४ मा न्युयोर्क सिटी क्षेत्रलाई केन्द्रबिन्दु बनाएर ५ दशमलव २ रेक्टर स्केलको भूकम्प गएदेखि न्युयोर्क सिटी क्षेत्रमा त्यती ठूलो भूकम्प गएको थिएन ।
त्योभन्दा अगाडि सन् १७८३ मा न्युजर्सी केन्द्रबिन्दु भएर ४ दशमलव ९ रेक्टर स्केलको भूकम्प गएको थियो । सन् १७३७ मा न्युयोर्क सिटी क्षेत्रलाई केन्द्रबिन्दु बनाएर ५ दशमलव २ रेक्टर स्केलको भूकम्प गएको थियो ।
न्युयोर्क सिटीमा पछिल्लो सबैभन्दा ठूलो भूकम्प सन् २००१ को अक्टोबर २७ मा न्युयोर्क सिटीको म्यानहटन केन्द्रबिन्दु बनाएर गएको थियो, जुन २ दशमलव ६ रेक्टर स्केलको थियो । सन् २००१ को जनवरी १७ मा न्युयोर्क सिटीको म्यानहटन केन्द्रबिन्दु बनाएर गएको भूकम्प २ दशमलव ४ रेक्टर स्केलको थियो ।
न्युयोर्क सिटीमा आजको भूकम्प ४ दशमलव ८ रेक्टर स्केलको रहेको युएस जियोलोजिकल सर्भेले जनाएको छ । सुरुमा भूकम्प ४ दशमलव ८ रेक्टर स्केलको भएको युएस जियोलोजिकल सर्भेले जनाएकोमा पछि सच्याएर ४ दशमलव ७ बनाएको थियो । पछि पुन ४ दशमलव ८ रेक्टर स्केल बनाइएको छ । आजविहान १० बजेर २३ मिनेटमा न्युयोर्क सिटीमा धक्का महसुस गरिएको हो ।
भूकम्पबाट कुनै क्षति र चोटपटक नभएको न्युयोर्क प्रहरीले जनाएको छ । सुनामीबारे कुनै चेतावनीहरु पनि जारी गरिएको छैन । न्युयोर्क सिटीमा यस्तो भूकम्प दुर्लभ मानिने भएकाले स्थानीयबासिहरु त्रसित भएका छन् ।
भूकम्पको धक्का न्युयोर्क, न्युजर्सी र कनेक्टिकटसम्म अनुभव गरिएको थियो । न्यु जर्सीदेखि लङ आइल्याण्डसम्म भवनहरू हल्लिएका रिपोर्टहरू आएका छन् । न्युयोर्क गभर्नर क्याथी होकुल र न्युयोर्क सिटीका मेयर एरिक एडम्सलाई भूकम्पबारे जानकारी दिइएको छ।
अगाडिको विवरणमा भएको त्रुटी सच्याइएको छ ।- सं.
