न्युयोर्क सिटीमा ४ दशमलव ८ रेक्टर स्केलको भूकम्पको धक्का
प्रकाशित मिति : चैत्र २३, २०८० शुक्रबार
न्युयोर्क सिटीमा ४ दशमलव ८ रेक्टर स्केलको भूकम्पको धक्का महसुस भएको छ । १० बजेर २३ मिनेटमा उक्त धक्का महसुस गरिएको छ । युएस जियोलोजिकल सर्भेका अनुशार उक्त भूकम्प न्युजर्सीको ह्वाइटहाउस स्टेशनबाट ७ किलोमिटर उत्तरपूर्वमा केन्द्रबिन्दु भएर गएको थियो ।
सुरुमा युएस जियोलोजिकल सर्भेले भूकम्प न्युजर्सीको लेबाननको ५ किलोमिटर उत्तरपूर्वमा केन्द्रबिन्दु भएर गएको गएर ४ दशमलव ८ रेक्टर स्केलको भएको जनाएको थियो ।
भूकम्पबाट कुनै क्षति र चोटपटक नभएको न्युयोर्क प्रहरीले जनाएको छ । सुनामीबारे कुनै चेतावनीहरु पनि जारी गरिएको छैन । न्युयोर्क सिटीमा यस्तो भूकम्प दुर्लभ मानिने भएकाले स्थानीयबासिहरु त्रसित भएका छन् ।
भूकम्पको धक्का न्युयोर्क, न्युजर्सी र कनेक्टिकटसम्म अनुभव गरिएको थियो । न्यु जर्सीदेखि लङ आइल्याण्डसम्म भवनहरू हल्लिएका रिपोर्टहरू आएका छन् । न्युयोर्क गभर्नर क्याथी होकुल र न्युयोर्क सिटीका मेयर एरिक एडम्सलाई भूकम्पबारे जानकारी दिइएको छ।
नोट: सुरुमा ४ दशमलव ८ रेक्टर स्केलको भूकम्प बताएको युएस जियोलोजिकल सर्भेले बीचमा सच्याएर ४ दशमलव ७ बनाएपनि पछि पुनः ४ दशमलव ८ बनाएको छ ।