लुम्बिनी प्रदेशका मुख्यमन्त्री चौधरीद्धारा राजिनामा , शुक्रबार माओवादीका महराले सपथ लिने संभाबना
प्रकाशित मिति : चैत्र २२, २०८० बिहीबार
लुम्बिनी प्रदेशका मुख्यमन्त्री डिल्लीबहादुर चौधरीले पदबाट राजीनामा दिनुभएको छ । विश्वासको मत लिनका लागि डाकिएको प्रदेश सभाको बैठकलाई संबोधन गर्दै मुख्यमन्त्री चौधरीले पदबाट राजिनामा दिनुभएको हो । चौधरी गत वर्ष वैशाख १४ गते राजनीतिक दल र एक स्वतन्त्र गरी ५३ जना सांसदको समर्थनमा मुख्यमन्त्रीमा नियुक्त हुनुभएको थियो ।
बहुमत जुटाउन कसरत गरेपनि असफल भएपछि प्रदेश सभा बैठकमा सम्बोधन गर्दै चौधरीले मुख्यमन्त्री पदबाट राजीनामा दिएको घोषणा गर्नुभएको हो । राजीनामा घोषणा गर्दै उहाँले अब बन्ने सरकारलाई गुण र दोषका आधारमा समर्थन र आलोचना गर्ने बताउनु भयो ।
मुख्यमन्त्रीको राजिनामा आएसंगै माओवादी केन्द्रका संसदिय दलका नेता जोखबहादुर महरालाई मुख्यमन्त्री बन्ने बाटो खुलेको छ । गठबन्धनमा एमाले र माओवादी केन्द्रका बिचमा लुम्बिनी प्रदेशमा माओवादी केन्द्रलाई नेतृत्व गर्ने अबसर दिने सहमति भएका कारण महरा मुख्यमन्त्री बन्ने करिव निश्चित जस्तैछ ।
महराले शुक्रबार नै सपथ लिने संभाबना रहेको छ । त्यसका लागि समर्थन गरेका दल संग संबादको प्रकृया अगाडि बढि सकेको माओवादी केन्द्र लुम्बिनी प्रदेशका अध्यक्ष सुर्दशन बरालले बताउनु भयो ।
यसअघि २०७९ साल पुस २७ गते नेकपा एमालेका संसदीय दलका नेता लिला गिरी मुख्यमन्त्री हुँदा महरा करिब तीन महिना अर्थमन्त्री बन्नुभएको थियो ।
८७ सदस्यीय लुम्बिनी प्रदेश सभामा सरकार निर्माणका लागि ४४ सांसदको समर्थन चाहिन्छ । एक जना राष्ट्रिय प्रजातन्त्र पार्टीका सांसद निलम्बनमा रहेकाले अब भने ८६ सदस्य मात्रै कायम रहेका छन् ।
लुम्बिनीमा एमालेका २९, कांग्रेसका २७, माओवादीका सभामुखसहित ११, नागरिक उन्मुक्ति र जनमतका ४।४, राप्रपा, जनता समाजवादी र लोकतान्त्रिक समाजवादीका ३।३, राष्ट्रिय जनमोर्चा र नेकपा एकीकृत समाजवादीका १ । १ र एक स्वतन्त्र सांसद छन् ।