अमेरिकाका क्रिप्टोकिङ साम बैंकम्यान-फ्राइडलाई २५ वर्षको जेल सजाय
प्रकाशित मिति : चैत्र १५, २०८० बिहीबार
अमेरिकामा क्रिप्टोकरेन्सीका मुगलका रुपमा चर्चित साम बैंकम्यान -फ्राइडलाई २५ वर्षको जेल सजाय सुनाइएको छ । धोखाधडीमा दोषी ठहरिएका उनलाई बिहीबार अदालतले २५ वर्षको जेल सजाय सुनाएको हो ।
संघीय अभियोजकहरूले उनलाई ४० देखि ५० वर्षसम्म जेल सजायको माग गरेतापनि अदालतले उनलाई त्यो भन्दा छोटो सजाय दिएको छ । तर उनका पक्षका वकिलहरूले माग गरेको साढे छ वर्षको सजाय भन्दा यो धेरै माथि रहेको छ । एक संघीय प्रोबेशन अफिसरले त १०० वर्ष जेल सजाय सिफारिस गरेका थिए ।
म्यानहट्टनको संघीय डिस्ट्रिक्ट अदालतका न्यायाधीश लुइस ए कपलानले उक्त सजाय सुनाएका हुन् । सजाय सुनाउने बेलामा ३२ वर्षीय बैंकम्यान फ्राइड अदालतको कोठामा जेलको पोशाक लगाएर उपस्थीत भएका थिए । उनलाई आफ्नो एफटीएक्स क्रिप्टोकरेन्सी एक्सचेन्जका ग्राहकहरूबाट ८ बिलियन डलरको चोरेको अभियोगमा दोषी ठहर गरिएको थियो । जसमा अधिकतम ११० बर्षसम्म सजाय हुनसक्ने प्रावधान थियो ।
सजाय सुनाउनु अघि बैंकम्यान फ्राइडले एफटीएक्स ग्राहकहरू, लगानीकर्ताहरू र कर्मचारीहरूसँग माफी मागेका थिए । मानिसहरू साँच्चै निराश महसुस गरेको र त्यसको लागि आफूले माफी माग्ने उनले बताएका थिए । हरेक चरणमा जे भयो त्यसको लागि माफी मागेको उनले बताएका थिए । आफ्नो गल्तीले आफूलाई हरेक दिन सताउने उनले बताएका थिए ।
सजायपछि क्रिप्टोकरेन्सीको ढिलो नियमन गरिएको संसारमा बढ्दो अस्थिरता र जोखिम लिने कुरालाई पर्दाफास गर्ने व्यापक ठगी मुद्दाको समापन भएको छ । नोभेम्बर २०२२ मा बैंकम्यान फ्राइडको क्रिप्टो एक्सचेन्ज रातारात पतन हुँदा ग्राहक बचतमा रहेको ८ बिलियन डलर हराएको थियो । त्यसपछि उनलाई उनलाई धोखाधडी, षड्यन्त्र र मनी लान्ड्रिङका सातवटा मुद्दामा दोषी ठहर गरिएको थियो।
१८ महिना अघि बैंकम्यान फ्राइड एक कर्पोरेट टाइटन र विश्वमा सबैभन्दा कान्छो बिलेनियर मध्ये एक थिए। बिलबोर्ड र म्यागजिन कभरहरूमा उनको अनुहार जताततै देख्न सकिन्थ्यो । आफ्नो सबै सम्पत्ति परोपकारमा दान गर्ने लक्ष्य रहेको बताउदै उनले राम्रो व्यक्तिको छवी बनाएका थिए ।
बहामासमा रहेको उनको एफटीएक्स कम्पनी क्रिप्टोकरेन्सीहरूको लागि सबैभन्दा ठूलो बजारहरू मध्ये एक थियो । यो प्रयोग गर्न सजिलो प्लेटफर्म थियो जहाँ लगानीकर्ताहरूले बिटकोइन र ईथर जस्ता डिजिटल सिक्काहरूका लागि डलर वा यूरो साट्न सक्थे । कम्पनीको मूल्य ३० बिलियन डलर थियो ।
तर नोभेम्बर २०२२ मा एक हप्ता भन्दा कम समयमा खाताहरूबाट ८ बिलियन डलर गायब गरेको पत्ता लागेको थियो । उनले ग्राहकको कोषबाट रकम निकालेर अरु ठाउमा हालेका थिए । बैंकम्यान फ्राइडले तत्काल बैंक्रप्सीका लागि दायर गर्ने वकिलहरूको टोलीलाई शक्ति हस्तान्तरण गर्दै राजीनामा दिएका थिए । अर्को महिना उनी बहामासको आफ्नो लक्जरी अपार्टमेन्टमा पक्राउ परेका थिए ।
