न्युयोर्क क्वीन्सको स्कुलमा विद्यार्थीबीच झगडापछि ६ जनालाई छुरा प्रहार, ५ जना पक्राउ
प्रकाशित मिति : चैत्र १४, २०८० बुधबार
न्युयोर्कको क्वीन्स जमैकामा रहेको एक चार्टर स्कूल भित्र छ जनामाथि छुरा प्रहार गरिएको बुधबार प्रहरीले जानकारी दिएको छ । प्रहरी अधिकारीहरूले १२ बजेर ४३ मिनेटमा आक्रमणको जानकारी पाएका थिए । त्यसपछि घटनास्थल ८९२५ १६१ स्ट्रीटमा पुग्दा छ जनालाई चोटपटक लागेको अवस्थामा फेला पारेका थिए ।
आकस्मिक सेवाहरू बोलाएर सबै छ जना व्यक्तिहरूलाई उपचारको लागि अस्पताल लगिएको थियो । सिटिजन एपमा पोस्ट गरिएको भिडियोमा २० भन्दा बढी प्रहरी अधिकारीहरू स्कूलको अगाडि उभिएको देखिएको थियो । रातो ट्र्याकसूट लगाएका एक व्यक्तिको हात पछाडि थियो भने कम्तिमा तीनवटा प्रहरी कार र एउटा अग्नी नियन्त्रक ट्रक सडकमा पार्क गरिएको थियो ।
प्रहरीले पाँच जनालाई हिरासतमा लिएका थिए। उनीहरु १५ देखि २० बर्षको बीचका रहेको जनाइएको छ । घटनाबारे अनुसन्धान भइरहेको प्रहरीले जनाएको छ । न्यु डन चार्टर हाई स्कूल २ मा झगडा भएपछि आक्रमणहरू भएको जनाइएको छ । झगडामा विद्यार्थीहरु सहभागी भएको जनाइएको छ ।
घटनामा घाइते हुनेहरुमा ५ जना विद्यार्थी र एक सुरक्षा गार्ड रहेका छन् । उनले झगडा तोड्न खोजेका थिए ।
एकजना शिक्षकले एकजना विद्यार्थीबाट चक्कु नियन्त्रणमा लिएको जनाइएको छ । क्याफेटेरियामा झगडा भएको र घाइतेहरुको केहीको हातमा र केहीको अनुहारमा चोटपटक लागेको जनाइएको छ ।