एकाधिकार कायम गरेको आरोप लगाउँदै एप्पलविरुद्ध बाइडेन प्रशासनबाट मुद्दा दायर
प्रकाशित मिति : चैत्र ८, २०८० बिहीबार
एकाधिकार कायम गरेको आरोप लगाउँदै एप्पलविरुद्ध बाइडेन प्रशासनले मुद्दा दायर गरेको छ, यो मुद्दामा अमेरिकाका विभिन्न १६ वटा राज्यहरु र वासिंटन डिसीले पनि साथ दिएका छन् । डिपार्टमेन्ट अफ जस्टिसले एप्पल विरुद्ध दायर अविश्वास मुद्दा एप्पल कम्पनीको पहुँच र प्रभावको लागि संघीय सरकारको सबैभन्दा महत्त्वपूर्ण चुनौती हो ।
८८ पृष्ठको मुद्दामा एप्पलले ग्राहकहरूलाई उनीहरूको आईफोनमा निर्भर राख्न र प्रतिस्पर्धी उपकरणमा स्विच गर्ने सम्भावना कम गर्ने अभ्यासहरूका साथ अविश्वास कानूनको उल्लङ्घन गरेको सरकारको तर्क रहेको छ । आईफोनको मूल्य घटाउन सक्ने भएकाले एप्पलले अन्य कम्पनीहरूलाई आफ्नो डिजिटल वालेट जस्ता एप्पल उत्पादनहरूसँग प्रतिस्पर्धा गर्ने एप्लीकेशनहरु प्रयोग गर्नबाट रोकेको सरकारको भनाई छ ।
एप्पलको नीतिले उपभोक्ताहरू र एप्पलका केही सेवाहरूसँग प्रतिस्पर्धा गर्ने साना कम्पनीहरूलाई हानी गरेको बाइडेन प्रशासनको तर्क छ । एप्पलको आचरणको प्रत्येक चरणले स्मार्टफोन एकाधिकार निर्माण र सुदृढ बनाएको सरकारले न्युजर्सीको डिस्ट्रिक्ट कोर्टमा दायर गरिएको मुद्दामा उल्लेख गरिएको छ ।
मुद्दाले एप्पलको लोकप्रिय उपकरण र सेवाहरूमा नियामक लगाम लगाउँछ । यो मुद्दा एप्पलको सबैभन्दा लोकप्रिय उपकरण र सबैभन्दा शक्तिशाली व्यवसाय आईफोनमा लक्ष्यित रहेको छ । आईफोन र अन्य उपकरणहरूमा प्रयोगकर्तालाई कडाईका साथ नियन्त्रण गरेर एप्पलले असमान खेल मैदान सिर्जना गरेको आलोचकहरुको भनाई छ ।
वर्षौंदेखि एप्पलले फोनको पेमेन्ट चिप र ब्लुटुथ ट्र्याकरहरूमा यसको लोकेशन सर्भिस सुविधामा ट्याप गर्नबाट वित्तीय कम्पनीहरूको पहुँच सीमित गरेको छ। प्रयोगकर्ताहरूलाई एप्पलका स्मार्टवाच र ल्यापटपजस्ता उत्पादनहरू अन्य निर्माताहरूले बनाएको उपकरणहरुको तुलनामा आईफोनमा जडान गर्न सजिलो छ। यसले आफ्नो आईफोनलाई अन्य स्मार्टफोनको तुलनामा बढी सुरक्षित बनाउने कम्पनीको भनाई छ । तर एप विकासकर्ताहरू र प्रतिद्वन्द्वी उपकरण निर्माताहरूले एप्पलले प्रतिस्पर्धालाई कुचल्न आफ्नो शक्ति प्रयोग गरेको आरोप लगाउँदै आएका छन् ।