ओहायोमा १६ महिनाकी छोरीलाई एक्लै छाडेर १० दिन घुम्नजाँदा छोरीको मृत्युपछि आमालाई जन्मकैद
प्रकाशित मिति : चैत्र ७, २०८० बुधबार
अमेरिकाको ओहायोमा १६ महिनाकी छोरीलाई घरमा एक्लै छाडेर १० दिनका लागि घुम्न जाँदा बालिकाको मृत्यु भएपछि बालिकाकी आमालाई बच्चाको हत्यामा दोषी ठहर गर्दै सजाय सुनाइएको छ । बालिकालाई घरमा एक्लै छाडेर गएपछि कैयन दिनसम्म केही खान नपाउँदा छटपटिएर बालिकाको मृत्यु भएको थियो । बालिकाकी आमालाई हत्यामा दोषी ठहर गर्दै आजीवन जेल सजाय सुनाइएको छ ।
३२ वर्षीया क्रिस्टेल क्यान्डेलारियोले आफ्नी १६ महिनाकी छोरी जेलिनको हत्या र बालिकालाई मृत्यु हुने गरी खतरामा पारेको अपराध स्वीकार गरेकी थिइन् । उनी गत जुन ६ मा जेलिनलाई घरमा केही बोतल दुधका साथ एक्लै छाडेर विदा मनाउन डेट्रोइट र केटा साथीसँग घुम्न पोर्तोरिको गएको जनाइएको छ ।
छिमेकीको डोरबेल क्यामेराले १६ महिनाकी बालिका बारम्बार चिच्याएको कैद गरेको थियो, जसमा उनकी आमाले छाडेर गएको दुई दिन पछि बिहान १ बजेसमेत रोएको कैद भएको थियो । जुन १६ मा फर्कदा बालिका जेलिनलाई मृत फेला पारेपछि उनले पुलिसलाई खबर गरेको अधिकारीहरूले बताएका छन् ।
जेलिनको मृत्यु अत्याधिक भोक र तिर्खाका कारण भएको कुयाहोगा काउन्टी मेडिकल परीक्षकको कार्यालयले सोमबार अदालतमा जानकारी दिएको थियो । त्यसले घटनालाई हत्याका रुपमा लिइएको थियो । बच्चाको मृत्यु हुँदा बालिकाको तौल दुई महिना अगाडिको तुलनामा ७ पाउण्ड कम रहेको पाइएको थियो ।
पोस्टमार्टम गर्ने डा. एलिजाबेथ मुनीले जेलिनको मृत्युलाई आफ्नो करियरमा अहिलेसम्मको सबैभन्दा दुखद र दुर्भाग्यपूर्ण घटनाहरू मध्येको एक भएको बताएकी थिइन् । बालिका सम्भवतः एक हप्तासम्म तडपिएको उनले बताइन् ।
बालिकाकी आमा क्रिस्टेल क्यान्डेलारियोले सोमबार अदालतमा आफूले हरेक दिन भगवान र छोरी जेलिनसँग माफी माग्ने बताएकी थिइन् । उनले आफ्नी अर्की छोरी र आमाबुवासँग पनि माफी मागेकी थिइन् ।