अमेरिकामा टिकटकमा प्रतिबन्ध लगाउन सक्ने बिल प्रतिनिधिसभाबाट दुई तिहाई बहुमतले पारित
प्रकाशित मिति : फाल्गुन ३०, २०८० बुधबार
अमेरिकामा टिकटकमा प्रतिबन्ध लगाउन सक्ने बिल प्रतिनिधिसभाबाट दुई तिहाई बहुमतले पारित भएको छ । बिलका पक्षमा ३५२ मत खसेको छ भने विपक्षमा ६५ मत खसेको छ । ह्वाइट हाउसको समर्थन प्राप्त भइसकेको यो बिल प्रतिनिधिसभाबाट पारित भइसकेकाले अब सिनेटमा लगिनेछ ।
बिल दुबै सदनबाट पारित भएमा अमेरिकामा टिकटकमा प्रतिबन्ध लगाउन सक्छ । टिकटकले चिनियाँ सरकारको जासुसी जोखिम निम्त्याउन सक्ने डरका कारण उर्जा र ब्यापारबारेको समितिले यो बिल अगाडि बढाएको हो ।
बिलमा चीनको बाइटडान्सलाई भिडियो एप टिकटकबाट अलग हुन वा अमेरिकी प्रतिबन्धको सामना गर्न झण्डै साढे ५ महिना दिने प्रावधान रहेको छ । टिकटकका लगभग १७० मिलियन अमेरिकी प्रयोगकर्ताहरू छन्।
रिपब्लिकन सांसद माइक गालाघर र डेमोक्रेटिक सांसद राजा कृष्णमूर्तिले एपको चिनियाँ स्वामित्वले उत्पन्न गरेको राष्ट्रिय सुरक्षा चिन्तालाई सम्बोधन गर्न बिल पेश गरेका थिए । माइक गालाघरले यो टिकटकमाथिको प्रतिबन्ध नभई ट्युमर हटाउन र यस प्रक्रियामा बिरामीलाई बचाउनको लागि डिजाइन गरिएको शल्यक्रिया भएको बताएका छन् । बिलले बाइटडान्सलाई टिकटक छाड्न १६५ दिन समय दिनेछ । यदि त्यसो नभएमा अमेरिकामा टिकटकमा प्रतिबन्ध लाग्नेछ ।
ह्वाइट हाउसका प्रेस सेक्रेटरी करिन जीन पियरले भने संसदमा ल्याइएको बिलको प्रशंसा गरेकी छिन् । उनले यो बिल राष्ट्रपतिको डेस्कमा पुगेको देख्न चाहेको बताएकी छिन् भने बाइडेनले आफूले यसमा हस्ताक्षर गर्ने बताएका छन् ।