न्युयोर्क सिटी अपार्टमेन्टमा टाउको विनाको शरीर फेला परेपछि न्यायसुधारक अधिकारकर्मी पक्राउ
प्रकाशित मिति : फाल्गुन २५, २०८० शुक्रबार
लामो समय जेलमा विताइसकेपछि आपराधिक न्याय प्रणालीमा सुधारको वकालत गर्दै जीवनको नयाँ अध्याय सुरु गरेका हाइ प्रोफाइल अधिकारकर्मी हत्या अभियोगमा पक्राउ परेका छन् । न्युयोर्क सिटीको अपार्टमेन्टमा टाउको विनाको जीउ फेला फेला परेपछि ४८ बर्षका सेल्डन जोनसन क्रुर हत्या अभियोगमा पक्राउ परेका हुन् ।
उनी गत वर्ष मात्र जेलबाट रिहा भएका थिए । हालै उनी एक उच्च प्रोफाइल पोडकास्टमा अतिथि समेत थिए । पक्राउ पछि उनलाई दोश्रो डिग्री हत्याको अभियोग लगाइएको स्थानीय जेल रेकर्डले देखाएको छ । उनीविरुद्ध हत्या, नरसंहार, हतियारको आपराधिक कब्जा र मानव शव लुकाएको लगायतका अभियोगहरु लगाइएको छ ।
उनलाई अदालतमा सुनुवाईको लागि पेश गरिएकोमा उनले अपराध स्वीकार नगरेको जनाइएको छ । उनलाई सोमबार पुन अदालतमा पेश गरिने छ । हिंशात्मक लुटपाटमा संलग्न अपराधमा उनले २ दशकभन्दा बढी जेलमा विताएपछि गत मेमा रिहा भएका थिए । त्यसपछि उनले वकिल लिन नसक्ने अपराधको आरोप लागेका युवालाई कानुनी प्रतिनिधित्व प्रदान गर्ने संस्थामा काम गर्दै आएका थिए ।
४४ वर्षीय कोलिन स्मलको हत्या अभियोगमा उनलाई पक्राउ गरिएको हो । कोलिन स्मलको जोनसनसँगको सम्बन्ध भने खुलाएको छैन । मंगलबार ब्रोंक्सको अपार्टमेन्टमा गोली चलेको सुनेपछि छिमेकीहरुले प्रहरीलाई खबर गरेका थिए । छिमेकीहरुले चार राउण्ड गोली चलेको सुनेको बताएका थिए ।
प्रहरीहरुले घटनास्थलमा पुग्दा अज्ञात व्यक्तिको टाउको नभएको जिउ फेला पारेका थिए । अधिकारीहरु स्मलको अपार्टमेन्टमा पुग्दा जोनसन त्यही थिए । पछि जोनसनको हार्लमको अपार्टमेन्टमा खोजी गर्दा पाखुरा, खुट्टा र टाउको फ्रिजमा राखिएको अवस्थामा फेला पारिएको थियो ।
जोनसनले जेलबाट छुटेपछि अपराधको आरोप लागेका व्यक्तिलाई जेलमा होइन पुनर्वासमा राख्नुपर्ने पक्षमा वकालत गर्दै आएका थिए । गत महिना एउटा पडकाष्टमा उनले आफू कसरी जेलमा गए र त्यसपछि उनको जीवन कसरी परिवर्तन भयो भन्नेबारे अन्तरवार्ता दिएका थिए ।