क्यानडामा ६ जना श्रीलंकनको हत्या, अभियोगमा १९ बर्षका श्रीलंकन विद्यार्थी पक्राउ
प्रकाशित मिति : फाल्गुन २४, २०८० बिहीबार
क्यानडाको ओटावामा ४ बालबालिकसहित ६ जना श्रीलंकन व्यक्तिको हत्या अभियोगमा १९ वर्षीय श्रीलंकन टिनएजरलाई प्रहरीले पक्राउ गरेको छ । ओटावा प्रहरीले बिहिबार जारी गरेको विज्ञप्ति अनुशार १९ वर्षीय फेब्रियो डेजोयसालाई फर्स्ट डिग्री हत्याका ६ अभियोग र हत्या प्रयासमा एक अभियोग लगाइएको छ ।
मृत्यु हुनेमा एकै परिवारका ५ जना रहेका छन् । मृतक ४ जना बालबालिकाहरु २ महिनादेखि ७ बर्षसम्मका रहेको जनाइएको छ ।
मृत्यु हुनेमा ३५ वर्षीय दर्शनी बनबरानायगे गामा वल्ववे दर्शनी दिलन्थिका एकन्याके र उनका चारजना बच्चाहरु रहेका हुन् । उनका श्रीमान् पनि घाइते भएका छन् भने उनको हाल अस्पतालमा उपचार भइरहेको छ । अर्का एक व्यक्ति ४० वर्षीय अमरकुनमुबियान्सेल गे गामिनी अमरकुनको पनि हत्या भएको हो ।
घटनाबारे थप अनुसन्धान भइरहेको प्रहरीले जनाएको छ । ओटावामा रहेको श्रीलंकन दूतावासले मृतक सबैजना श्रीलंकन नागरिक रहेको पुष्टी गरेको हो । प्रहरीले घटनालाई सामुहिक गोलीकाण्ड नभई सामुहिक हत्या भएको बताएको छ ।
अभियुक्त अध्ययनका लागि क्यानडा आएका श्रीलंकाली नागरिक रहेको जनाइएको छ । ओटावाका प्रहरी प्रमुख एरिक स्टब्सका अनुशार अनुसन्धानकर्ताहरुले हत्यामा प्रयोग गरीएको धारिलो हतियार फेला पारेका छन् ।
कभर तस्वीरमा हत्या गरिएका ५ जना र घाइते श्रीमान् ।