कपिलबस्तुबाट काठमाण्डौका लागि छुटेको बस दुर्घटना , ६ जनाको ज्यान गयो
प्रकाशित मिति : फाल्गुन २२, २०८० मंगलबार
कपिलवस्तुबाट काठमाडौँतर्फ आउँदै गरेको लु २ ख २१२१ नम्बरका यात्रुवाहक बस धादिङको गजुरी गाउँपालिका–५ घाटबेँसीमा दुर्घटनामा परेको छ । बुधबार विहान भएको सो दुर्घटनामा एक महिलासहित ६ जनाको मृत्यु भएको छ ।
बस पृथ्वीराजमार्गबाट करिब १ सय मिटर तल त्रिशूली नदीमा खसेको जिल्ला प्रहरी कार्यालय धादिङका प्रहरी उपरीक्षक गौतम केसीले जानकारी दिनुभयो । उहाँले दुर्घटनामा ३० जनाभन्दा बढी घाइते भएका बताउनुभयो ।
घाइतेहरुको अवस्था गम्भीर रहेको कारण मृतकको संख्या बढ्न सक्ने प्रहरीले जनाएको छ। दुर्घटना स्थलमा अझै केही बेपत्ता भएको हुनसक्ने आशंकामा खोजी कार्य जारी रहेको प्रहरीले बताएको छ।
घटनास्थलमा नेपाल प्रहरी, सशस्त्र प्रहरी बल, नेपाली सेना तथा स्थानीयले उद्धार गरिरहेका छन् । सशस्त्र प्रहरी बल, विपद् व्यवस्थापन तालिम शिक्षालय कुरिनटार चितवनको टोली पनि उद्धारमा आइपुगेका छन् ।
बसचालक रुपन्देही लुम्बिनी संस्कृति नगरपालिका–९ का ३८ वर्षीय हरिराम हरिजनलाई प्रहरीले नियन्त्रणमा लिएको छ । बसमा ४९ जना सवार रहेको जानकारी बसचालकले प्रहरीलाइ दिएका छन् । मृतकको सनाखत हुन बाँकी रहेको जनाइएको छ ।