डोनाल्ड ट्रम्पले मानहानीवापत ई जीन क्यारोललाई ८३ मिलियन डलर तिर्नुपर्ने अदालतको फैसला
प्रकाशित मिति : माघ १२, २०८० शुक्रबार
७७ बर्षीय पूर्व राष्ट्रपति डोनाल्ड जे ट्रम्पले मानहानीको मुद्दामा लेखिका ८० बर्षीया ई जीन क्यारोललाई ८३ दशमलव ३ मिलियन डलर तिर्नुपर्ने म्यानहटन जुरीले फैसला सुनाएको छ । एक दशक पुरानो बलात्कारको आरोप लगाएपछि ट्रम्पले सामाजिक सञ्जाल, पत्रकार सम्मेलनहरु र मुद्दा चलिरहेकै बीचमा समेत लेखिका क्यारोलको मानहानी गरेको अभियोगमा अदालतबाट यो आदेश सुनाइएको हो ।
जसमध्ये दण्डनीय क्षतिका लागि ट्रम्पले ६५ मिलियन डलर तिनुपर्ने नौ सदस्यीय जूरीले ठहर गरेको छ । ह्वाइट हाउसमा रहँदा र कार्यालय छोडेपछि ट्रम्पको लगातार क्यारोलमाथिको आक्रमणलाई निरन्तरता दिएको उनका वकिलले दावी गरेका थिए । हालैको एक दिनमा ट्रम्पले सामाजिक सञ्जालमा क्यारोलकाबारेमा ४० भन्दा बढी व्यंग्यात्मक पोस्टहरू गरेका थिए । क्यारोलले आफूलाई जताततैबाट आक्रमण भएको र आफू नयाँ ब्रम्हाण्डमा बाँचेको बयान दिएकी थिइन् ।
ट्रम्पलाई एक वर्षभन्दा कम अवधिमा क्यारोललाई क्षतिपूर्ति तिर्न अदालतले आदेश दिइएको यो दोस्रो पटक हो। गतबर्षको मेमा न्यूयोर्कको एक अदालतले ट्रम्पलाई यौन दुर्व्यवहारको आरोपमा दोषी ठहर गर्दै क्यारोललाई ५ मिलियन डलर क्षतिपूर्ति दिनुपर्ने फैसला गरेको थियो । सन् १९९० मा ट्रम्पले आफूलाई यौन दुर्व्यवहार गरेको र झुटो भनेर बदनाम गरेको आरोप लगाएपछि छ जना पुरुष र तीन महिलाको निर्णायक मण्डलले क्यारोललाई क्षतिपूर्ति दिलाउने निर्णय गरेको थियो ।
अदालतले क्यारोललाई ५ मिलियन तिर्न आदेश दिएकोमा ट्रम्पले गरेको मानहानिको लागि ३ मिलियन डलर र सन् १९९० को दशकमा गरेको यौन दुर्व्यवहार सहित दुर्व्यवहारको लागि २ मिलियन डलर तोकिएको थियो । यद्यपि अदालतले डिपार्टमेन्ट स्टोरमा क्यारोललाई बलात्कार गरेको आरोपमा भने ट्रम्पलाई जिम्मेवार पाएन किनभने मुद्दा फौजदारी अदालतमा नभई सिभिल कोर्टमा चलिरहेको थियो।
अदालतले फैसला गरेपनि क्यारोलले रकम भने तत्कालै पाउने छैनिन् । गत वर्ष पहिलो मानहानि मुद्दामा जुरीले क्यारोललाई कूल ५ मिलियन डलर क्षतिपूर्ति दिलाएपनि उनले त्यो रकम समेत अझै पाएकी छैनिन् । किनभने त्यो फैसला अझै पनि पुनरावेदन भइरहेको छ । ट्रम्पले शुक्रबारको ८३ मिलियन डलर क्षतिपूर्तिको फैसलाको पनि पुनरावेदन गर्ने घोषणा गरिसकेका छन् । सर्वोच्च अदालतका मुद्दासहित सबै अपीलहरू टुंगो नलागेसम्म क्यारोलले रकममा पहुँच पाउने छैनन्।