क्यालिफोर्नियाका पावरबल विजेताले आमाबाबुका लागि किनिदिए ४ मिलियन डलरको घर
प्रकाशित मिति : पुस २२, २०८० आईतबार
क्यालिफोर्नियामा झण्डै २ बिलियन डलरको पावरबल लोटरी जितेका एडविन क्यास्ट्रोले आफूले जितेको रकम उदारतापूर्वक परिवारसँग बाँडिरहेका छन् । परिवारका सदस्यहरुले पनि उनलाई अचानक प्राप्त भएको सम्पत्ति व्यवस्थापन गर्न मद्दत गरिरहेका छन्।
३१ वर्षीय क्यास्ट्रोले आफ्ना आमाबाबुका लागि क्यालिफोर्नियाको अल्टाडेनामा ४ मिलियन डलरको जापानी शैलीको घर किनिदिएका हुन् । क्यास्ट्रोलाई सम्पत्ति व्यवस्थापन गर्न बैंकरको रूपमा काम गर्ने आफ्नो कान्छो भाइ २७ वर्षीय जेसीले पनि मद्दत गरिरहेका छन् । क्यास्ट्रोले झण्डै २ बिलियनको लोटरी जितेपनि एकमुष्ठ ९९६ मिलियन डलर लिने विकल्प रोजेका थिए ।
जितेको रकम भोजभतेर र फजुल खर्चमा नलगाई उनीहरुले मिलेर व्यवस्थापन गरिरहेको जनाइएको छ । उनीहरु वकिलको कार्यालय र बैंकमा गइरहेका तस्वीरहरुमात्र सार्वजनिक भइरहेका छन् । बाबुआमाका लागि किनिदिएको घरमा पाँच शयनकक्ष र पाँच स्नानगृहहरू छन् । ४ हजार ६ सय ३१ बर्गफिटमा रहेको घरबाट सान गेब्रियल माउन्टेन्सको वरपरका रमाइला दृश्यहरु हेर्न सकिन्छ ।
यु आकारको घरको भव्य आंगन रहेको छ भने जापानी छाना र शान्त पोखरी समेत रहेको छ । क्यास्ट्रोलाई बेच्नुअघि घर अन्तिम पटक सन् २०१० मा १ दशमलव १ मिलियन डलरमा बजारमा आएको थियो। ज्याकपट जितेपछि क्यास्ट्रोले क्यालिफोर्नियामा ७६ मिलियन डलरमा तीन विशाल घरहरु किनेका छन् ।
उनको सबैभन्दा ठूलो खरिद सेप्टेम्बरमा थियो, जब उनले बेल एयरमा इन्फिनिटी पूलसहितको कम्पाउन्ड, ७ शयनकक्ष, ११ बाथरूम भएको घर ४७ मिलियन डलरमा किनेका थिए। क्यास्ट्रोको हलिउड हिल्समा २५ मिलियनको घर पनि किनेका छन् । उनले यो घर प्रारम्भिक मूल्य भन्दा १० मिलियन कममा किनेका थिए । घरमा सात शयनकक्ष र ११स्नानगृहहरू छन् भने एउटा पोखरी पनि छ । जहाँबाट सम्पूर्ण लस एन्जलसलाई हेर्न सकिन्छ ।
क्यास्ट्रो अझै पनि लाइमलाइटमा अभ्यस्त भइरहेका छन् । उनी पहिले नै ठगी गर्नेहरूद्वारा समेत लक्षित भइसकेका छन् । साथै सार्वजनिक रूपमा आफ्नो सम्पत्ति देखाउनदेखि सावधान रहेका छन् । यद्यपी उनले लस एन्जलसको वरिपरि २ लाख डलरको कार ड्राइभ गरिरहेको देखिन्छ। क्यास्ट्रो आफ्नो नयाँ सम्पत्तिको बाबजुद नम्र छन् र जनताको नजरबाट टाढा रहन चाहन्छन् ।
उहाँ आफ्नो लाखौं रकम केही राम्रो काममा प्रयोग गर्न प्रतिबद्ध रहेको जनाइएको छ । उनले धेरै स्थानीय परोपकारी संस्थाहरूलाई महत्त्वपूर्ण दान गरिसकेका छन् ।