यी १२ राज्यहरूमा बस्ने अमेरिकीहरूले यस वर्ष कम कर तिर्ने
अमेरिकाका १२ राज्यका बासिन्दाहरुले यस वर्ष कम कर तिर्नेछन् । किनभने धेरै राज्यहरूले यस वर्ष आयकरहरू घटाउँदै छन् । जसका कारण धेरै अमेरिकीहरूले मुद्रास्फीतिसँग जुधिरहेको बखत खल्तीमा थप पैसा राख्न पाउने भएका छन् । १२ राज्यहरुमध्ये धेरैजसो रिपब्लिकनहरूको नेतृत्वमा रहेका छन् जसले यस वर्ष बासिन्दाहरूको लागि कुनै न कुनै रूपमा कर घटाउनेछन् ।
जनवरीको सुरुमा अर्कान्सासमा शीर्ष व्यक्तिगत आयकर दर गत वर्षको ४ दशमलव ९ प्रतिशतबाट घटाएर ४ दशमलव ४ प्रतिशतमा झारिएको छ । परिवर्तनले दर कटौतीलाई गति दिएको छ किनभने नयाँ दर २०२५ को कर वर्षमा सुरु हुने तय गरिएको थियो।
कनेक्टिकटले पनि यस वर्ष करदाताहरूलाई केही राहत दिनेछ । ३ प्रतिशतको व्यक्तिगत आयकर कोष्ठकलाई २ प्रतिशतमा कटौती गर्नुका साथै ५ प्रतिशतको कोष्ठकलाई घटाएर ४ दशमलव ५ प्रतिशतमा झारिएको छ । यद्यपि यो राहत १ लाख ५० हजार वा सोभन्दा बढी कमाउने व्यक्तिहरू वा ३ लाख डलदर वा सोभन्दा बढी कमाउने विवाहित जोडीहरूमा लागू हुँदैन।
त्यस्तै जर्जियाले पनि छवटा व्यक्तिगत आयकर दरहरू हटाएर ५ दशमलव ४९ प्रतिशतको फ्लैट कर दर लागु गरेको छ । इन्डियानाले पनि कर दर कटौतीलाई गति दिएको छ । व्यक्तिगत आयकर दरलाई ३ दशमलव १५ प्रतिशतबाट घटाएर ३ दशमलव शुन्य ५ प्रतिशतमा झारिएको छ ।
आयोवा बिस्तारै ३ दशमलव ९ प्रतिशतको योजनाबद्ध फ्लैट कर दर तर्फ अघि बढिरहेको छ, जुन २०२६ मा लागु गर्न चाहन्छ। २०२४ मा यसले शीर्ष सीमान्त कर दरलाई ५ दशमलव ७ प्रतिशतमा घटाउनेछ।
१० हजार डलरभन्दा बढी आम्दानी भएका मिसिसिपीका बासिन्दाहरूले यस वर्ष ४ दशमलव ७ प्रतिशतको एकल कर तिर्नेछन् । जुन ५ प्रतिशतको प्रारम्भिक दरभन्दा कम हो । कर दर अन्ततः २०२५ मा ४ दशमलव ४ प्रतिशत र २०२६ मा ४ प्रतिशतमा झर्नेछ।
मोन्टानाले २०२१ मा यसको सातवटा कर कोष्ठकहरूलाई दुईमा झारेर एक प्रमुख कर सुधारलाई अनुमोदन गरेको थियो । २०२४ देखि मोन्टानाका बासिन्दाहरूको लागि शीर्ष सीमान्त दर ५ दशमलव ९ प्रतिशतमा झर्नेछ, जुन अघिल्लो वर्षको ६ दशमलव ७५ प्रतिशतभन्दा कम हो । यो दर २०२४ फाइलिङ वर्षको लागि ४ दशमलव ७ प्रतिशतमा झर्नेछ । उच्च दर एकल करदाताहरूका लागि २० हजार ५ सय भन्दा माथिको आम्दानीमा र संयुक्त रूपमा फाइल गर्ने विवाहित जोडीहरूको लागि ४१ हजार माथि लागू हुनेछ।
नेब्रास्काले १ लाखभन्दा माथिको सबै आम्दानीको लागि २०२४ मा यसको शीर्ष सीमान्त कर दर ७ दशमलव २५ प्रतिशतबाट घटाएर ५ दशमलव ८४ प्रतिशत बनाएको छ । राज्यले २०२७ सम्ममा शीर्ष दरलाई ३ दशमलव ९९ प्रतिशतसम्म घटाउने काम गरिरहेको छ।
न्यू ह्याम्पशायरले ब्याज र लाभांश आम्दानीमा लाग्ने कर हटाउदैछ । कर दर अघिल्लो बर्षको ४ प्रतिशतबाट घटाएर ३ प्रतिशतमा झारिदैछ भने २०२५ मा हटाउने तय गरिएको छ । नर्थ क्यारोलिनामा फ्ल्याट आयकर दर अघिल्लो वर्षको ४ दशमलव ७५ प्रतिशतबाट घटाएर ४ दशमलव ५ प्रतिशतमा झारेको छ ।
गत वर्ष पारित कानून अनुशार ओहायोले व्यक्तिगत आयको लागि शीर्ष दुई सीमान्त कर दरहरूलाई एकमा समाहित गरेको थियो र सन् २०२४ का लागि करको दर ३ दशमलव ५ प्रतिशतमा सेट गरेको थियो ।
साउथ क्यारोलिनाले आफ्नो शीर्ष व्यक्तिगत आयकर दरलाई सन् २०२४ मा ६ दशमलव ५ प्रतिशतबाट घटाएर ६ दशमलव ४ प्रतिशतमा झार्नेछ । यो राज्यले करका दरलाई आगामी बर्षहरुमा ६ प्रतिशतमा झार्ने लक्ष्य राखेको छ।
