अन्तर्राष्ट्रिय विद्यार्थीको ओइरो पछि आवास समस्याका कारण कोटा तोक्नेबारे विचार गर्दै क्यानडा सरकार
प्रकाशित मिति : भाद्र ६, २०८० बुधबार
आवास महँगो बन्दै गएपछि दबाबमा रहेको क्यानाडाको सरकारले हालैका वर्षहरूमा बढेको विदेशी विद्यार्थी भिसाका लागि निश्चित कोटा तोक्नेबारे विचार गर्न सक्ने नयाँ आवास मन्त्री सन फ्रेजरले बताएका छन् । पछिल्ला बर्षमा क्यानडामा अध्ययनका लागि आउने विद्यार्थीहरुको संख्यामा उल्लेख्य बृद्धि भएपछि आवासका लागि समस्या हुने गरेको छ भने भाडादर पनि महँगो बन्दै गएको छ ।
आधिकारिक तथ्याङ्क अनुशार सन् २०२२ मा सक्रिय विद्यार्थी भिसामा ८ लाख विदेशी विद्यार्थीहरू थिए जबकी सन् २०१२ मा यो संख्या २ लाख ७५ हजारमात्र थियो। क्यानाडा अन्तर्राष्ट्रिय विद्यार्थीहरूको लागि लोकप्रिय गन्तव्य हो किनभने यहाँ काम अनुमति प्राप्त गर्न अपेक्षाकृत सजिलो रहेको छ।
गत महिना नयाँ आवास मन्त्रीका रुपमा कार्यभार सम्हाल्नु अगाडि अध्यागमन मन्त्री समेत भएका फ्रेजरले विद्यार्थीहरूको संख्यामा तीव्र वृद्धिले केही आवास बजारहरूमा स्पष्ट दबाब दिइरहेको बताएका छन् । विदेशी विद्यार्थीहरूको संख्यामा क्याप लगाउन सकिन्छ कि भनेर सोध्दा उनले यो विचार गर्नुपर्ने विकल्पहरू मध्ये एक रहेको तर सरकारले अहिलेसम्म निर्णय नगरेको बताएका छन् । सरकारका अस्थायी अध्यागमन कार्यक्रमहरू यति छोटो अवधिमा यस्तो विस्फोटक वृद्धि देखिने अपेक्षाका साथ डिजाइन नगरिएको उनले बताए ।
आधिकारिक विपक्षी कन्जरभेटिभ पार्टीले अक्टोबर २०२५ हुनै पर्ने संघीय चुनावको अगाडि प्रधानमन्त्री जस्टिन ट्रुडोको लिबरल सरकारले आवास मुद्दालाई सम्बोधन गर्न पर्याप्त काम नगरिरहेको आरोप लगाएको छ । करिब ३९ दशमलव ५ मिलियन जनसंख्या भएको क्यानडाले २०२५ मा रेकर्ड ५ लाख नयाँ स्थायी बासिन्दाहरू भित्र्याउने योजना बनाएको छ।