अमेरिकामा ट्याक्स फाइल गर्ने अन्तिम दिन भोलि मंगलबार, अप्रिल १८ भित्र ट्याक्स फाइल गर्न नसके के गर्ने ?
प्रकाशित मिति : बैशाख ४, २०८० सोमबार
अमेरिकामा जनवरी २३ बाट सुरु भएको ट्याक्स सिजन भोलि मंगलबार अर्थात् अप्रिल १८ मा सकिदैछ । आईआरएसले जनवरी २३ देखि व्यक्तिगत ट्याक्स रिटर्नहरू स्वीकार गर्न थालेको थियो ।
धेरै जसो करदाताहरूले मंगलबार अप्रिल १८ सम्म आफ्नो विवरण पेश गर्न वा म्याद थप्न अनुरोध गर्न सक्नेछन्। सामान्यतया ट्याक्स फाइल गर्ने अन्तिम दिन अप्रिल १५ हुने भएतापनि उक्त दिन शनिबार परेकाले र अप्रिल १७ मा आईआरएसको मुख्यालय रहेको वाशिंगटनमा मुक्ति दिवस छुट्टी भएकाले डेडलाइन अप्रिल १८ भएको हो ।
अधिकांश करदाताहरूले सामान्यतया आईआरएसबाट रिफण्ड प्राप्त गर्ने अपेक्षा गर्न सक्छन्। छिटो रिफण्ड लिनका लागि दुईवटा कुरामा ध्यान दिनुपर्छ । पहिलो, फाइलिङको २१ दिन भित्र रिफण्ड प्राप्त गर्नको लागि आईआरएसले ट्याक्स रिटर्न इलेक्ट्रोनिक रूपमा फाइल गर्न सुझाव दिएको छ । दोश्रो, रकम डिपोजिटका लागि बैंक एकाउन्ट दिन सुझाव दिएको छ ।
कागजी रुपमा फाइल गरिएको र डिपोजिटका लागि बैंक एकाउन्ट दिइएको सन्दर्भमा अनलाइनबाट फाइल गरिएका र डिपोजिटका लागि बैंक एकाउन्ट दिइएको तुलनामा ढिलो रिफण्ड प्राप्त हुन्छ । त्यस्तै कागजी रुपमा फाइल गरिएका र रिफण्ड चेक हुलाकमार्फत मगाउनेहरुका सन्दर्भमा सबैभन्दा ढिलो हुन्छ ।
यद्यपि आईआरएसले केही रिफण्डमा अतिरिक्त समीक्षा आवश्यक हुन सक्ने र यदि प्रणालीहरूले कुनै त्रुटिहरू पहिचान गरेमा प्रशोधन गर्न लामो समय लाग्न सक्ने चेतावनी दिएको छ । यदि रिटर्नमा गल्तीहरू भएमा प्रणालीले चोरी वा धोखाधडीको शंका गर्दछ।
त्यसका अतिरिक्त अर्नड इन्कम ट्याक्स क्रेडिट, कमदेखि मध्यम आय भएकाहरुका लागि कर छुट, वा अतिरिक्त चाइल्ड ट्याक्स क्रेडिट दावी गर्ने करदाताले मध्य फेब्रुअरी अघि रिफण्ड प्राप्त गर्न नसकने आईआरएसले चेतावनी दिएको छ । आईआरएसले यस वर्ष करदाताहरूलाई विगतका बर्षको तुलनामा थोरै रिफण्डका लागि तयारी हुन चेतावनी दिएको थियो ।
किनभने २०२२ मा संघीय सरकारले कुनै राहत चेकहरु प्रदान गरेको छैन । २०२१ मा आईआरएसले तेश्रो चरणको १४ सय डलरको राहत चेक दिएको थियो । योग्य अमेरिकीहरूले आफ्नो कर रिटर्नमा भुक्तान नगरिएको रकम अझै पनि दाबी गर्न सक्छन्।
अमेरिकामा अप्रिल १८ भित्र ट्याक्स फाइल गर्न नसकेमा के गर्ने ?
अमेरिकामा यो बर्ष ट्याक्स फाइल गर्ने अन्तिम दिनका रुपमा अप्रिल १८ लाई तोकिएको छ । सामान्यतया अप्रिल १५ सम्म ट्याक्स फाइल गरिसक्नुपर्ने भएतापनि यो बर्ष अप्रिल १८ मंगलबारसम्मको डेडलाइन तोकिएको हो ।
अप्रिल १८ भित्र ट्याक्स फाइल गर्न नसक्ने करदाताहरुले अक्टोबर १७ सम्म फाइल गर्नेगरी अवधि थपका लागि अनुरोध समेत गर्न सक्छन् । ट्याक्स फाइलका लागि अवधि थप्दा ट्याक्स तिर्नुपर्नेहरुका लागि कर तिर्ने अवधि भने थप हुँदैन । त्यसैले ट्याक्स तिर्नुपर्नेहरुले अनुमानित ट्याक्स डेडलाइनभन्दा अगाडि नै तिर्नुपर्छ ।
फर्म ४८६८ को कागजी भर्सन हुलाकमार्फत पठाएर ट्याक्स फाइलको अवधि थप गर्न सकिन्छ । यदि तपाईले ट्याक्स तिर्नुपर्ने छ भने उक्त रकमको चेक वा मनी अर्डर पनि पठाउनुपर्छ । तर हुलाकबाट पठाउँदा अप्रिल १८ वा सो भन्दा अगाडि नै पोष्टमार्क हुन जरुरी छ ।
त्यस्तै कागजी फर्म नभरिकनै पनि फाइल गर्ने अवधि लम्बाउन सकिन्छ । तर त्यसका लागि तपाईले तिर्नुपर्ने ट्याक्सको हिस्सा तीनवटा मध्ये एउटा अनलाइन प्रणालीबाट तिर्नुपर्छ । तपाई डाइरेक्ट पे, विद्युतीय संघीय कर तिर्ने प्रणाली वा क्रेडिट तथा डेबिट कार्डबाट तिर्न सक्नुहुनेछ । यसरी तिरेपछि तपाईको ट्याक्स फाइल गर्ने अवधि स्वत लम्बिन्छ ।
त्यस्तै निशुल्क ट्याक्स फाइल गर्ने प्रणालीबाट पनि फर्म ४८६८ पठाउन सकिन्छ । तर आफूले तिर्नुपर्ने रकम भने हुलाकबाट मनी अर्डर वा चेकमार्फत पठाउनुपर्छ । त्यसरी रकम पठाउँदा भरिएको ४८६८ लाई भौचरका रुपमा प्रिन्ट गरेर चेकसँगै राखेर पठाउनुपर्छ ।
यदि तपाईले अहिले तिर्नुपर्ने ट्याक्सको रकम तिर्न सक्नुहुन्न भने पनि फर्म ४८६८ फाइल गर्नुपर्छ । त्यसपछि कसरी ट्याक्स रकम तिर्ने भन्नेबारे विकल्प छनौट गर्न सक्नुहुनेछ ।
विदेशमा काम गर्ने र बस्ने अमेरिकन करदाताहरुका लागि भने ट्याक्स फाइल गर्ने समय अझै पनि बाँकी छ । उनीहरुले जुन १५ भित्र ट्याक्स फाइल गरिसक्नुपर्ने प्रावधान रहेको छ ।
सामान्यतया १२ हजार ५ सय ५० डलरभन्दा कम आम्दानी भएकाले अमेरिकामा ट्याक्स फाइल गर्न अनिवार्य छैन । तर विज्ञहरुले विभिन्न खालका क्रेडिटहरु प्राप्त गर्नका लागि उनीहरुलाई पनि ट्याक्स फाइल गर्न सुझाव दिएका छन् ।
पहिलो कुरा १२ हजार ९ सय ५० डलर भन्दा कम आम्दानी भएकाले कर तिर्नु नपर्ने भएकाले ट्याक्स फाइल गर्न अनिवार्य नभएपनि उनीहरुले ट्याक्स फाइल गरेमा आईआरएसबाट रिफण्ड पाउनसक्ने हुनसक्छ । खासगरी घरमा बच्चाबच्ची वा आश्रित भएकाहरुले ठूलो रकम रिफण्ड प्राप्त गर्न सक्छन् ।
घरमा बालबालिका भएकाहरुले अर्नड इन्कम ट्याक्स क्रेडिटवापत ६ हजार ९ सय ३५ डलरसम्म रिफण्डयुक्त क्रेडिट पाउनसक्छन् । त्यस्तै एकल व्यक्तिले पनि ५६० डलरसम्म अर्नड इन्कम ट्याक्स क्रेडिट प्राप्त गर्न सक्छन् ।
त्यस्तै चाइल्ड ट्याक्स क्रेडिट वापत एउटा बच्चाको २ हजार डलर डलरसम्म पाउनसक्ने व्यवस्था रहेको छ । त्यस्तै घरमा बच्चा वा आश्रितहरु भएकाहरुले चाइल्ड वा डिपेण्डेण्ट केयर क्रेडिट पनि पाउन सक्छन् । बच्चा वा आश्रितको हेरचाहका लागि रकम तिरेका र आफूले बाहिर काम गरेकाले यो क्रेडिट पाउनसक्छन् ।