अमेरिकी दूतावास काठमाडौंको भिसा आवेदन प्रकृया अगाडि बढाउने वेवसाइटमा समस्या
प्रकाशित मिति : चैत्र २५, २०७९ शनिबार
अमेरिकी दूतावास काठमाडौंको भिसा आवेदन प्रकृया अगाडि बढाउने वेवसाइटमा समस्या यथावत रहेका कारण सेवाग्राहीहरु मारमा परेका छन् । मार्च २९ देखि वेवसाइटमा आएको समस्याका कारण प्रयोगकर्ताहरूले भिसाका लागि अप्वाइन्टमेन्ट लिन, अप्वाइन्टमेन्ट रद्द गर्न, प्रमाणिकरण गर्नमा समस्या भोगिरहेका छन् ।
मार्च २९ पछि तिरेको भिसा शुल्क भुक्तानी पुष्टिकरण सक्रिय गराउनमा समेत ढिलाइको अनुभव गरेको दूतावासले जनाएको छ । वेवसाइटमा अहिलेपनि समस्या कायम रहेको र यो समस्या समाधान गर्न काम गरिरहेको दूतावासले स्पष्ट पारेको छ । पछि फेरि लग इन गर्ने प्रयास गर्न आग्रह गर्दै यसबाट पर्न गएको असुविधाप्रति दूतावासले सेवाग्राहीसँग क्षमा मागेको छ ।
सर्भरमा आएको समस्याका कारण सेवाग्राहीहरुले नयाँ अप्वाइन्टमेन्ट बुक गर्न र भिसा शुल्क स्वीकृत हुनमा समस्या आएको गुनासो गरेका छन् । दूतावासले भिसा च्याटका क्रममा पनि वेबसाइटको वर्तमान समस्याहरूबारे सचेत रहेको र कन्ट्राक्टरहरुले समस्या समाधान गर्न काम गरिरहेको जनाएको छ।
आपतकालीन समस्या भएका व्यक्तिहरूले [email protected] मा इमेल वा ९८०१२०८३९२ मा फोन गरेर दूतावासमा सम्पर्क गर्न सक्ने दूतावासले जनाएको छ ।