मे १ देखि अमेरिकामा एसाइलम आवेदनको नयाँ संस्करण अनिवार्य
प्रकाशित मिति : चैत्र २५, २०७९ शनिबार
मे १ देखि युएससीआईएसले एसाइलमको फर्म आई ५८९ को नयाँ संस्करण अनिवार्य गरेको छ । अक्टोबर १२, २०२२ को संस्करण मे १ देखि पूर्णरुपमा लागु गर्ने युएससीआईएसले स्पष्ट पारेको हो । नोभेम्बर १० मा युएससीआईएसले फर्मको नयाँ संस्करण प्रकाशित गरेको थियो ।
मे १ अगाडि भने जुन २६, २०२२ को संस्करण पनि प्रयोग गर्न सकिनेछ । संस्करणको मिति फर्मको पृष्ठको तल उल्लेख गरिएको हुन्छ भने त्यसको साथ फर्म भर्नका लागि दिशानिर्देशन समेत समावेश हुन्छ ।
अघिल्लो संस्करणहरूमा विभिन्न निर्देशनहरू समावेश छन् जुन पछिल्लो एसाइलमका नियमहरुसँगै प्रचलनमा रहेका छैनन् । त्यसैले यसबारे ध्यान दिन समेत सचेत गराइएको छ ।
फेब्रुअरी ७, २०२२ मा अमेरिकी अदालतले एसाइलमका दुई नियमहरू हटाएको थियो । ट्रम्प प्रशासनले सन् २०२० को जुन २२ र जुन २६ मा ल्याएको नियम फेब्रुअरी ८, २०२२ देखि लागु नहुनेगरी हटाइएको थियो । त्यसैले नयाँ संस्करण र पूरानो संस्करणका फर्म भर्दा दिशानिर्देशहरु फरक फरक रहेका छन् ।
फेब्रुअरी ७ देखि लागु हुनेगरी युएससीआईएसले सन् २०२० को जुन अगाडिकै नियमका प्रावधानहरू लागू गरेको हो । फेब्रुअरी ८ मा पेन्डिङ रहेका वा त्यसपछि पछि प्राप्त भएका एसाइलम र वर्क परमिटका आवेदनमा सन् २०२० को जुन अगाडिनै नियम लागु हुनेछ । युएससीआईएसले अदालतको निर्णयलाई पालना हुनेगरी नयाँ फर्महरु ल्याएको हो ।