आजदेखि थप १५ सय डलर तिरेमा विद्यार्थी भिसावाहकको ‘ओपीटी वर्क परमिट’ ३० दिनभित्र
प्रकाशित मिति : फाल्गुन २२, २०७९ सोमबार
आजदेखि ओपीटी वर्क परमिटका लागि नयाँ आवेदन दिने र अवधि थपका लागि आवेदन दिने विद्यार्थी भिसावाहकलाई युएससीआईएसले शीघ्र प्रकृया सुविधा दिएको छ । मार्च ६ देखि लागु भएको यो सुविधा पहिले आवेदन पेन्डिङरहेकाहरुका सन्दर्भमा मात्र लागु हुनेछ । पहिलोपटक आवेदन दिनेहरुका हकमा भने अप्रिल ३ देखि शीघ्र प्रकृयाको सुविधा लागु हुनेछ ।
ओपीटी खोज्ने विद्यार्थीभिसावाहक र विज्ञान, प्रविधि, इन्जिनियरिङ्, र गणित विषयमा स्टीम ओपीटी थप गर्न खोज्ने विद्यार्थीहरूका सन्दर्भमा लागु हुने यो सुविधा अन्तरगत आवेदकले मार्च ६ भन्दा अगाडि पेन्डिङ वर्क परमिट आवेदन आई ७६५ बारे शीघ्र निर्णय गराउन अतिरिक्त १५ सय डलर तिरेर शीघ्र प्रकृया फर्म आई ९०७ बुझाउन सक्नेछन् । अहिले यो सुविधा ओपीटी सुरु हुनु अगाडि र समाप्त भएपछि र विज्ञान, प्रविधि, इन्जिनियरिङ्, र गणितका विद्यार्थीका लागि २४ महिना विस्तारका आवेदनमा लागु हुनेछ ।
अप्रिल ३ पछि भने नयाँ आवेदनका साथमा समेत आवेदकहरुले १५ सय डलर अतिरिक्त शुल्क तिरेर शीघ्र प्रकृयाको अनुरोध गर्न सक्नेछन् । शीघ्र प्रकृयाको आवेदन अनलाइन र हुलाकमार्फत दुईमध्ये एक विधिबाट दिन सकिन्छ । अनलाइनबाट आवेदन दिंदा शुल्क बुझाउन समेत सहज रहेको छ ।
शीघ्र प्रकृयाको आवेदन दिइसकेपछि युएससीआईएसले आवेदनबारे ३० दिनभित्र निर्णय दिनेछ । ३० दिनभित्र निर्णय दिन नसकेका आवेदनहरुका सन्दर्भमा युएससीआईएसले शीघ्र प्रकृया शुल्क फिर्ता गर्नुपर्ने प्रावधान रहेको छ ।
यस अगाडि युएससीआईएसले रोजगारमा आधारित पहिलो र दोश्रो वर्गीकरण अन्तर्गत फारम आई १४० मा शीघ्र प्रकृयाका लागि प्रिमियम प्रोसेस विस्तारको अन्तिम चरण घोषणा गरिसकेको छ । विस्तारको अघिल्लो चरणहरूमा पेन्डिङ आवेदनमा मात्र शीघ्र प्रकृया अनुरोध गर्ने अवशर दिइएकोमा नयाँ चरणमा नयाँ आवेदनमा पनि शीघ्र प्रकृया अनुरोध गर्न सकिने व्यवस्था गरेको थियो ।
विगतमा फाइल गरिएका र पेन्डिङ अवस्थामा रहेका बहुराष्ट्रिय कार्यकारी र प्रबन्धक वा उन्नत डिग्री भएका पेशाकर्मी वा नेशनल इन्ट्रेस्ट वेभर अन्तरगतका असाधारण क्षमता भएकाहरुबाट दायर गरिएका सबै फारम आई १४० निवेदनहरूमा शीघ्र प्रकृया अनुरोध गर्न सकिने व्यवस्था गरेको थियो ।
जनवरी ३०, २०२३ देखि युएससीआईएसले सबै पेन्डिङ ई १३ बहुराष्ट्रिय कार्यकारी र प्रबन्धक याचिकाहरू र ई २१ नेशनल इन्ट्रेस्ट वेभर याचिकाहरूमा शीघ्र प्रकृयाको अनुरोध स्वीकार गर्न सुरु गरेको थियो । साथै नयाँ फाइल गरिने ई १३ बहुराष्ट्रिय कार्यकारी र प्रबन्धक याचिकाहरू र ई २१ नेशनल इन्ट्रेस्ट वेभर याचिकाहरूमा शीघ्र प्रकृयाको अनुरोध स्वीकार गर्न सुरु गरेको थियो ।
पहिले घोषणा गरिएझैं युएससीआईएसले दक्षता बढाउन र समग्र कानूनी अध्यागमन प्रणालीमा बोझ कम गर्ने प्रयासको एक भागको रूपमा अतिरिक्त आवेदनका प्रकारहरूमा प्रिमियम प्रोसेस विस्तार गर्ने जनाएको छ ।
प्रिमियम प्रोसेसको विस्तारलाई चरणबद्ध कार्यान्वयन गर्ने क्रममा निकट भविश्यमा गैर आप्रवासी भिसा थप वा परिवर्तनको आवेदन आई ५३९ मा समेत शीघ्र प्रकृया अनुरोध गर्न सक्ने व्यवस्था गर्ने युएससीआईएसले जनाएको छ । त्यसै क्रममा आगामी मे महिनामा आई ५३९ पेन्डिङ रहेका निश्चित विद्यार्थीहरु र एक्सचेन्ज भिजिटरलाई शिघ्र प्रकृयाको अनुरोध गर्न सक्ने सुविधा दिइनेछ भने जुन महिनामा नयाँ आई ५३९ फाइल गर्ने निश्चित विद्यार्थीहरु र एक्सचेन्ज भिजिटरलाई यो सुविधा दिइनेछ ।
यी चरणहरू कार्यान्वयन गर्न तयार भएपछि यसको औपचारिक घोषणा गरिने युएससीआईएसले जनाएको छ । प्रिमियम प्रोसेसको विस्तारले नियमित आवेदन प्रकृयामा लैजान ढिलो नगर्ने युएससीआईएसले जनाएको छ ।