अब अमेरिकाको विद्यार्थी भिसा पढाई सुरु हुनुभन्दा ३६५ दिन अगाडिसम्म पाउन सकिने
प्रकाशित मिति : फाल्गुन २०, २०७९ शनिबार
अब अमेरिकाको विद्यार्थी भिसा पढाई सुरु हुनुभन्दा ३६५ दिन अगाडिसम्म जारी गर्न सकिनेगरी अमेरिकी विदेश मन्त्रालयले नयाँ नीति ल्याएको छ । अब एफ र एम भिसामा अमेरिका आउन चाहने विद्यार्थीहरूले आई २० मा उल्लेख भएको पढाई सुरु हुने मिति भन्दा ३६५ दिन अगाडि सम्म भिसाका लागि आवेदन दिन र भिसा प्राप्त गर्न सक्नेछन् ।
यसभन्दा अगाडि अमेरिकामा अध्ययन गर्न चाहने विद्यार्थीहरूले आई २० मा उल्लेख पढाई सुरु हुने मितिभन्दा १२० दिनभित्रमात्र भिसा अन्तर्वार्ताको अप्वाइन्टमेन्ट लिनसक्ने प्रावधान रहेको थियो । तर अब यो प्रावधानलाई ३६५ दिन बनाइएपछि विद्यार्थी भिसामा आउन चाहनेहरुलाई निकै सहज हुने अपेक्षा गरिएको छ ।
तर पढाई सुरु हुनुभन्दा बढीमा ३० दिन अगाडिमात्र अमेरिका प्रवेश गर्न पाइने नियममा भने कुनै परिवर्तन गरिएको छैन । पढाई सुरु हुनुभन्दा ३६५ दिन अगाडिसम्म भिसा पाएतापनि अमेरिका प्रवेश भने पढाई सुरु हुनुभन्दा बढीमा ३० दिनभित्र गर्नुपर्नेछ । नयाँ घोषणाले विद्यार्थीहरूलाई उनीहरूको विद्यार्थी भिसाको लागि आवेदन दिन र अन्तर्वार्ता मितिहरू खोज्न थप समय दिनेछ।
त्यस्तै आई २० फारम पनि अब पढाई सुरु हुने मिति भन्दा बाह्र देखि चौध महिना अगाडि जारी गरिनेछ। यस अगाडि आई २० फारमहरू शैक्षिक संस्थाहरूले पढाई सुरु हुने मिति भन्दा चार देखि छ महिना अघिसम्ममात्र जारी गर्न सक्थे, ६ महिनाभन्दा अगाडि जारी गर्न नसक्ने प्रावधान रहेको थियो ।