नेपालबाट एकबर्षमा ४४ जना अमेरिकन नागरिक देशनिकाला
प्रकाशित मिति : फाल्गुन १०, २०७९ बुधबार
नेपालका अध्यागमन अधिकारीहरूले सन् २०२२ मा नेपालबाट ४४ जना अमेरिकनलाई देशनिकाला गरेका छन् । उनीहरुलाई तोकिएको अवधिसम्म नेपाल फर्कन नपाउनेगरी निष्कासन गरिएको जनाइएको छ ।
२०२२ मा सबैभन्दा धेरै चीनका नागरिकहरु १९० जनालाई देशनिकाला गरिएकोमा दोश्रोमा अमेरिकन नागरिकहरुलाई देशनिकाला गरिएको हो । देशनिकालामा पर्नेहरुमा बेलायतका ३०, फ्रान्सका १९ र क्यानडाका १७ जना रहेका छन् ।
निष्कासन गरिएकामध्ये अधिकांश भिसा नलिइकन वा भिसा अवधि सकिएपछि नवीकरण नगरिकन नेपालमा बसिरहेका विदेशी नागरिक रहेको अध्यागमन अधिकारीहरुले बताएका छन् । विभिन्न अपराधमा सजाय पाएका विदेशीलाई पनि फिर्ता पठाइएको छ।
सन् २०२२ मा नेपालबाट कुल ५६४ जना विदेशी नागरिकहरू निष्कासनमा परेकोमा ५०४ जना भिसा अवधि सकिएर पनि नेपालमा विनाभिसा बसोबास गरिरहेका र ६० जना विभिन्न अपराधमा सजाय पाएका व्यक्तिहरू रहेको जनाइएको छ ।