गैरकानूनी उपस्थीतिपछि अमेरिकाभित्रै १० बर्ष विताएकाहरुले ग्रिनकार्ड पाउन अमेरिका छाड्नु नपर्ने
प्रकाशित मिति : फाल्गुन ७, २०७९ आईतबार
अमेरिकामा गैरकानूनी उपस्थीतिका कारण अमेरिकामा स्वीकार्य हुनका १० बर्षसम्मको प्रतिबन्ध लागेका आप्रवासीहरु अब उक्त अवधिभर अमेरिकाबाहिर बस्न अनिवार्य नहुने भएको छ । अब उनीहरुले उक्त अवधि अमेरिकाभित्रै विताएको भएतापनि त्यसपछि ग्रिनकार्डका लागि योग्य हुनसक्ने फैसला बोर्ड अफ इमिग्रेशन अपिलले गरेको छ ।
यस अगाडिसम्म गैर कानूनी उपस्थीतिका कारण ३ देखि १० बर्षसम्मको प्रतिबन्ध लागेकाहरु पुन अमेरिका आउन वा ग्रिनकार्ड प्राप्त गर्नका लागि उक्त अवधि अमेरिकाबाहिर विताएको हुनुपर्ने प्रावधान रहेको थियो । मेक्सिकन आप्रवासीबारेको मुद्दामा फैसला गर्दै अध्यागमन अदालतको पुनरावेदनले यस्तो फैसला गरेको हो ।
उक्त मुद्दामा रहेका प्रतिवादी आप्रवासी सन् २००० को जुनमा अमेरिका आएका थिए । त्यतीबेला उनलाई अमेरिकामा ३० दिनमात्र रहनका लागि अनुमति दिइएको थियो । तर ती व्यक्ति सन् २००१ को अगस्तसम्म अमेरिकामा नै बसे । अगस्तको अन्त्यतिर उनी फेरि ३० दिनका लागि अमेरिकामा रहनका लागि बोर्डर क्रसिङ कार्डमा अमेरिका आए । तर उनी तोकिएको समयमा फर्केनन् । अमेरिकाभित्रै रहे ।
उनका छोरा अमेरिकी नागरिक थिए । जब उनका छोरा २१ बर्षका भए, उनले बुबाका लागि ग्रिनकार्ड आवेदन दिए । तर त्यतीबेला अध्यागमन न्यायाधीशले उनी ग्रिनकार्डका लागि योग्य नभएको निष्कर्ष निकाले किनभने उनी अमेरिकामा १ बर्षभन्दा लामो गैरकानूनी उपस्थीतिपछि लागेको १० बर्षको प्रतिबन्धका क्रममा पूरै १० वर्षमा अमेरिका बाहिर बसेका थिएनन् ।
उनीसँग योग्य आफन्त नभएका कारण उनी छुटका लागि आवेदन दिनसमेत योग्य नभएको निष्कर्ष न्यायाधिसले निकालेका थिए । त्यसपछि उनले बोर्ड अफ इमिग्रेशन अपिलमा पुनरावेदन गरेका थिए । उक्त मुद्दामा फैसला गर्दै बोर्ड अफ इमिग्रेशन अपिलले प्रतिबन्धको १० बर्षको अवधि अमेरिकाबाहिर विताउन अनिवार्य नभएको निष्कर्ष निकालेको हो ।
कुनै पनि आप्रवासीको अमेरिकामा १८० दिन भन्दा बढी तर एक वर्ष भन्दा कम अवधिको लागि गैरकानूनी उपस्थिती भएमा र देशनिकालाको प्रकृया सुरु हुनु अगाडि नै अमेरिका छाडेमा अमेरिकामा पुन प्रवेश वा ग्रिनकार्ड प्राप्त गर्नका लागि ३ बर्षसम्मको प्रतिबन्ध लाग्छ । त्यस्तै कोही व्यक्ति अमेरिकामा १ बर्षभन्दा बढी गैरकानुनी रुपमा बसेमा उक्त व्यक्तिविरुद्ध देशनिकालाको प्रकृया सुरु भएपनि नभएपनि अमेरिकामा पुन प्रवेश वा ग्रिनकार्ड प्राप्त गर्नका लागि १० बर्षसम्मको प्रतिबन्ध लाग्छ ।
न्युयोर्कका कानुन व्यवसायी केशवराज सेडाई भन्छन् -‘अब उक्त १० बर्षको अवधि अमेरिकाबाहिर विताउन अनिवार्य छैन । अमेरिकाभित्रै विताएको भएतापनि ११ औं बर्षमा योग्य भएको खण्डमा त्यस्ता व्यक्तिले ग्रिनकार्ड फाइल गर्न सक्छन् । २१ बर्ष नाघेका अमेरिकी नागरिकका बुबाआमाका सन्दर्भमा अब सजिलो हुने भएको छ । उनीहरुले १ बर्ष गैरकानुनी उपस्थीति भइसकेपछि वा देशनिकालाको आदेशपछि अमेरिकामा १० बर्ष विताएका छन् भने अमेरिका नछाडिकनै २१ बर्ष नाघेका अमेरिकी नागरिक छोराछोरीमार्फत ग्रिनकार्ड प्राप्त गर्न सक्छन् ।
यो मुद्दा अमेरिकी नागरिकमार्फत ग्रिनकार्ड फाइल गर्ने सन्दर्भको रहेकाले अन्य सन्दर्भमा कसरी लागु हुन्छ त्यो भने हेर्न बाँकी रहेको सेडाईले जानकारी दिनुभयो । अमेरिकामा आइसकेपछि कागजपत्रविहिन भएका र अमेरिकामा छोराछोरीहरु जन्माएका नेपालीहरुको संख्या उल्लेख्य रहेको छ । उनीहरुका छोराछोरीहरु जब २१ बर्ष पुग्छन्, तब उनीहरुमार्फत बुबाआमाले पनि अमेरिका नछाडिकनै ग्रिनकार्ड पाउन अब सहज हुने भएको छ ।’