विना भिसा अमेरिका प्रवेश गर्न खोज्नेहरुको संख्या २३ महिनामा सबैभन्दा कम
प्रकाशित मिति : फाल्गुन १, २०७९ सोमबार
जनवरीमा मेक्सिकोबाट अमेरिका विना भिसा गैरकानूनी प्रवेश गर्न खोज्नेहरुको संख्या सन् २०२१ को फेब्रुअरी यताको सबैभन्दा कम रहेको अधिकारीहरुले बताएका छन् । जनवरीमा अमेरिकी सीमा गस्तीले १ लाख २८ हजार भन्दा बढीलाई पक्राउ गरेको छ, जुन डिसेम्बरको तुलनामा ४२ प्रतिशतले कम हो ।
राष्ट्रपति जो बाइडेनका लागि अमेरिका मेक्सिको सीमाको परिचालन राजनीतिक कमजोरीका रुपमा रिपब्लिकनहरूबाट आलोचना हुदै आएको छ । साथै यही विषयमा होमल्याण्ड सेक्युरिटी सेक्रेटरीमाथि रिपब्लिकनले महाभियोग लगाउने चेतावनी समेत दिएका छन् ।
हालैका हप्ताहरूमा बाइडेन प्रशासन अधिकारीहरूले गैरकानुनी रुपमा अमेरिका प्रवेश कम हुनका लागि एक नयाँ कार्यक्रमलाई जस दिएका छन् । उक्त कार्यक्रमले क्युबा, हाइटी, निकारागुआ र भेनेजुएलाका आप्रवासीहरूसँगको अमेरिका प्रवेशका लागि कानूनी बाटो प्रदान गर्छ ।
राष्ट्रपतिले जनवरी ५ मा नयाँ सीमा कार्यक्रमको घोषणा गरेदेखि, गैरकानूनी सीमा पार गर्नेहरूको संख्या घटेको बाइडेन प्रशासनका अधिकारीले बताएका छन् । मध्य अमेरिकाबाट विना भिसा अमेरिका छिर्न खोज्ने आप्रवासीहरूको संख्यामा पनि उल्लेखनीय गिरावट आएको छ।