केही भिसा वाहकले अमेरिका नछाडिकनै भिसा नविकरण गर्नपाउने कार्यक्रम ल्याउदै विदेश मन्त्रालय
प्रकाशित मिति : माघ २८, २०७९ शनिबार
अमेरिकी विदेश मन्त्रालयले केही विदेशी नागरिकलाई अमेरिका नछाडिकनै भिसा नविकरणका लागि अनुमति दिने कार्यक्रम परीक्षण गर्न सुरु गर्ने जनाएको छ । यो कार्यक्रम अन्तरगत केही भिसा वाहकलाई म्याद सकिएका भिसाहरु नविकरण गर्न अनुमति दिनेछ । भिसा नविकरणणका लागि विदेश यात्रा गर्न र विदेशमा रहेको अमेरिकी दूतावासमा आवेदन दिन आवश्यक पर्नेछैन । कार्यक्रमको परीक्षण यसैबर्षदेखि गर्ने अपेक्षा गरिएको छ ।
यो कार्यक्रम सुरुमा एच र एल भिसा आवेदकका सन्दर्भमा लागु हुने अपेक्षा गरिएको छ । अमेरिकी दूतावासहरूमा भिसा आवेदन ब्याकलगहरूको प्रभावलाई कम गर्ने प्रयासमा अमेरिकी विदेश मन्त्रालयले यो कार्यक्रम परीक्षण गर्ने योजना बनाएको हो ।
यो कार्यक्रमलाई व्यापक रूपमा कार्यान्वयन गर्ने योजनाहरूको बारेमा धेरै कुरा अज्ञात छ। महामारीको उचाईमा अमेरिकी दूतावासहरूमा विकसित भएको असाधारण रूपमा लामो भिसा आवेदन ब्याकलगहरू कम गर्ने माध्यमको रूपमा अमेरिकामा नै नविकरण अनुमति दिन पहिलेदेखि नै आग्रह गरिदै आएको थियो ।
अहिले धेरै अमेपरकी दूतावासहरू महामारी पूर्वको अवस्थामा फर्केका छन् । यद्यपी भारत र अन्य धेरै प्रमुख क्षेत्रहरूमा अहिले पनि चर्को ब्याकलग कायम रहेको छ ।
अमेरिकाभित्रैबाट भिसा पुन प्रमाणीकरण नयाँ होइन। सन् २००४ सम्म अमेरिकी विदेश मन्त्रालयले केही गैर आप्रवासी भिसा वाहकहरूलाई वाशिंगटन, डीसीमा रहेको विदेश मन्त्रालयको भिसा कार्यालयमा हुलाक मार्फत कागजात पठाएर उनीहरूको भिसा नवीकरण गर्न अनुमति दिदै आएको थियो ।
ई, एच, एल, ओ, पी लगायतका भिसा हुनेहरुलाई यस्तो सुविधा दिइएको थियो । भिसाहरू म्याद सकिनुभन्दा ६० दिन अघि र म्याद समाप्त भएको एक वर्षसम्मको अवधिमा नविकरण गर्नसकिने प्रावधान थियो ।
२००४ मा खारेज भएको उक्त कार्यक्रम ती विदेशी नागरिकहरूको लागि लोकप्रिय विकल्प थियो जसको देशमा रहेका दूतावासहरूमा आवेदनहरूको उच्च मात्रा र लामो प्रक्रियाको ब्याकलगहरू थिए।
सन् २००१ को सेप्टेम्बर ११ को आतंककारी हमलाहरू पछि लागू गरिएको राष्ट्रिय सुरक्षा कानूनले आवश्यक पर्ने आवेदक बायोमेट्रिक्स सङ्कलन गर्ने माध्यम राज्य विभागसँग नभएकोले यो कार्यक्रम बन्द गरिएको थियो। यद्यपी निश्चित कूटनीतिक र अन्तर्राष्ट्रिय संगठन भिसाहरूको लागि यो विकल्प कायम रहदै आएको छ ।
अमेरिकी दूतावासहरूमा गैरआप्रवासी भिसा नवीकरणको लागि लामो पर्खाइ र ती पर्खाइहरूको कारणले गर्दा हुने अवरोधहरूको सम्भावनाको सामना गर्ने विदेशी नागरिकहरूको लागि विदेश मन्त्रालयले ल्याउन लागेको कार्यक्रम आशाजनक समाचार हो। यद्यपि विदेशी नागरिकहरू र तिनीहरूका रोजगारदाताहरू सचेत हुनुपर्दछ कि कार्यक्रमको दायरा साँघुरो र समय सीमित हुन सक्छ । किनभने विदेश मनत्रालयले पुन प्रमाणीकरण गर्ने क्षमताको परीक्षण गर्नेछ । परीक्षण पूरा भएपछि अमेरिकी विदेशमन्त्रालयलाई कार्यक्रम पूर्णरुपमा लागु गर्न केही महिना लाग्नसक्छ ।