आईआरएसले हटायो झण्डै २२ राज्यबारे अन्यौल, अधिकांश राज्यका राहतमा कर नलाग्ने
प्रकाशित मिति : माघ २८, २०७९ शनिबार
फोटो: भियाचेस्लाभ बुब्लिक
राज्यले जारी गरेको मुद्रास्फीति राहत भुक्तानी वा ट्याक्स रिटर्न विरुद्ध संघीय करहरू सङ्कलन नगर्ने आईआरएसले शुक्रबार स्पष्ट पारेको छ । जसले राज्यबाट विभिन्न प्रकारका रिबेटहरु प्राप्त गर्ने करोडौं करदाताहरूको लागि राहत भएको छ ।
आईआरएसले यस अगाडि करदाताहरूलाई उनीहरूको ट्याक्स फाइल केही समय रोक्न भनेको थियो किनकि अधिकारीहरूले राज्यबाट प्राप्त राहत रकमहरुमा संघीय कर लाग्ने नलाग्ने निर्धारण गर्न बाँकी थियो । छिटो ट्याक्स फाइल गर्न सुझाव दिदै आएको आईआरएसले ट्याक्स फाइल रोक्न दिएको सुझावलाई असामान्य मानिएको थियो । अमेरिकामा ट्याक्स फाइल गर्ने सिजन जनवरी २३ मा सुरु भएको थियो ।
शुक्रबारको घोषणा पछि २० भन्दा बढी राज्यका करदाताहरूले अब आफ्नो ट्याक्स फाइल गर्न सक्नेछन्। अलास्का, क्यालिफोर्निया, कोलोराडो, कनेक्टिकट, डेलावर, फ्लोरिडा, हवाई, आइदायो, इलिनोय, इन्डियाना, मेन, न्युजर्सी, न्युमेक्सिको, न्युयोर्क, ओरेगन, पेन्सिलभेनिया र रोड आइल्याण्डका बासिन्दाहरूले अब राज्यले दिएका राहत, रिफण्ड वा रिबेटमा ट्याक्स तिर्नुपर्ने छैन । उक्त रकमबारे ट्याक्स फाइल गर्दा रिपोर्ट गर्न पनि आवश्यक छैन ।
आईआरएसले ती राज्यहरूद्वारा दिइएका राहत भुक्तानीहरू सामान्य कल्याण वा प्रकोप राहत भुक्तानीको रूपमा प्रवर्द्धनका लागि भएकाले संघीय कर योग्य नहुने बताएको छ। जर्जिया, म्यासाचुसेट्स, साउथ क्यारोलिना र भर्जिनियाका करदाताहरुले भने राज्यबाट भएको भुक्तानीहरूलाई आयको रूपमा रिपोर्ट गर्नुपर्नेछ ।
सन् २०२१ र २०२२ मा लगभग दुई दर्जन राज्यहरूले मुद्रास्फीतिको सामना गर्न राहत भुक्तानीहरु जारी गरेका थिए । क्यालिफोर्नियाले मध्यम वर्गको ट्याक्स रिटर्न अन्तरगत २ सय डलरदेखि १०५० डलरसम्मको राहत १६ मिलियनलाई दिइसकेको छ भने यो रकमका लागि २३ मिलियन योग्य छन् । न्यूयोर्कले औसत देखि कम आय भएका बासिन्दाहरूलाई औषत २७० डलरको मूल्यको मुद्रास्फीति राहत भुक्तानी प्रदान गरेको थियो भने भाडा र सम्पत्ति कर राहत लागू गरेको थियो । ओरेगनले कम आय भएका घरपरिवारहरूलाई ६ सय डलरको चेक पठायो भने जर्जियाले २०२१ को रिटर्न पेश गरेपछि कर फाइल गर्नेहरुलाई ५ सय डलरको क्रेडिट दियो ।