नातिनीलाई तेल लगाएपछि भिडियो टिकटकमा हाल्दा अष्ट्रेलियामा नेपाली पक्राउको घटना के हो ?
प्रकाशित मिति : माघ २६, २०७९ बिहीबार
अष्ट्रेलियाको क्यानवेरामा यसैसाता ५० वर्षिय नेपाली हजुर आमालाई नातिनीलाई तेल लगाइदिएको भिडियो टिकटकमा पोष्ट गरेको अभियोगमा पक्राउ गरियो । उनलाई जनवरी ६ आइतबार साँझ आफ्नै घरबाट पक्राउ गरिएको थियो ।
उनीविरुद्ध अहिले तीन वटा अभियोग लगाइएको छ । २ बर्षकी नातिनीको नांगो भिडियो बनाएर टिकटकमा पोष्ट गरेको उनीमाथि अभियोग छ ।
टिकटकले एक विज्ञप्ति जारी गरी उनीहरूले सामग्रीको बारेमा थाहा पाउने बित्तिकै पुलिसलाई खबर गरेको बताएको छ ।
बाल शोषण सामग्रीको उत्पादन, वितरण र कब्जालाई सम्बोधन गर्नको लागि अष्ट्रेलियामा विशेष कानुनहरू छन् । अपराध ऐन १९०० ले यी अपराधहरूका लागि कसुर र दण्डहरू तोकेको छ । सरकारसँग यस प्रकारको गैरकानूनी गतिविधिलाई रोक्नको लागि बलियो प्रतिबद्धता छ।
बाल शोषण सामग्री उत्पादनको अपराधमा अष्ट्रेलियामा अधिकतम १५ वर्षको जेल सजाय हुनसक्छ । इन्टरनेट वा मोबाइल फोन प्रयोग गरेर त्यस्ता सामाग्री बनाएको अपराधमा पनि १५ बर्षसम्मको जेल सजाय हुनसक्छ । १० वर्ष मुनिको बच्चामाथि अशोभनीय व्यवहारको अपराधमा १० बर्षसम्मको कैद सजाय हुनसक्छ । हजुरआमाविरुद्ध यी ३ वटै अभियोग लगाइएको छ ।
सामग्री पत्ता लगाउनेबित्तिकै अरुले हेर्नु अगाडि नै हटाएको टिकटकको भनाई छ ।
टिकटकले भिडियो डिलिट गरेर संघिय प्रहरीलाई जनवरी २७ मा सुचना दिएको आधारमा प्रहरीले पक्राउ गरेको थियो । सोमबार बिहान एसीटी मजिस्ट्रेट अदालतमा प्रारम्भिक सुुनुवाईपछि फेब्रुअरी २८ तारिखमा अदालतमा उपस्थित हुने सर्तमा उनलाई अहिले धरौटीमा रिहा गरिएको जनाइएको छ ।
नातिनी जन्मेपछि स्याहारसुसारका लागि उनी ९ महिना अघि मात्र अष्ट्रेलियाका आएकी थिईन् । गत महिना नातिनीलाई तेल लगाएर मालिस गरेपछि हजुरआमाले भिडियो बनाएर टिकटकमा पोष्ट गरेकी थिइन् ।
अष्ट्रेलियामा जो कोहीले पनि नग्नता सहित १८ वर्ष भन्दा कम उमेरको व्यक्तिको छवि वा भिडियो साझा गर्न अवैध छ। यसलाई बाल शोषण सामग्री मानिन्छ र अष्ट्रेलियाको कानून अन्तर्गत गम्भीर आपराधिक अपराध हो।
यदि कुनै अभिभावकले आफ्नो बच्चाको यस्तो तस्बिर सामाजिक सञ्जालमा पोस्ट गरेमा, उनीहरूलाई बाल शोषण सामग्री उत्पादन, वितरण र स्वामित्वमा राखेको अभियोग लाग्न सक्छ, जसमा जेल लगायतका कडा सजाय हुन्छ।
थप रूपमा, यस तरिकाले नाबालिगहरूको छविहरू साझा गर्दा बच्चाको लागि गम्भीर दीर्घकालीन परिणामहरू हुन सक्छन्, किनकि छविहरू स्थायी रूपमा अनलाइन पहुँचयोग्य हुन सक्छन् र उनीहरूलाई धम्की, उत्पीडन वा शोषणका अन्य प्रकारहरूको अधीनमा हुन सक्छ।
संक्षेपमा, सामाजिक सञ्जालमा नाबालिगहरूको नग्न तस्बिरहरू साझेदारी गर्न कहिल्यै स्वीकार्य छैन, र त्यसो गर्दा गम्भीर कानुनी परिणामहरू हुन सक्छ।
जानकारीको अभाव र सांस्कृतिक भिन्नताका कारण पनि कैयन नेपालीहरु विदेशमा यस्ता घटनाहरुमा फस्ने गरेका छन् । अमेरिकामा समेत बालबालिकालाई नुहाइदिने वा तेल लगाइदिने क्रममा गोप्य अंगहरुमा छोएका कारण कैयन नेपालीहरु फस्ने गरेका छन् ।
फोनमा समेत राख्नुहुदैन त्यस्ता सामाग्री
एप्पल कम्पनीले पनि प्रयोगकर्ताका आईफोनमा बालबालिकाका नांगा तस्वीर राखिएका वा बाल यौन दुराचार सम्बन्धित तस्वीर भए नभएको स्क्यान गर्छ । बाल संरक्षण समुहहरुले उठाएका आवाजहरुको सम्बोधन गर्दै एप्पलले सन् २०२१ मा यो नयाँ योजना अगाडि ल्याएको थियो ।
न्युट्रल म्याच नामको यो कार्यक्रम अन्तरगत बालबालिकाका नांगा तस्वीर वा यौन दुराचारका सामाग्री आईफोनमा राखिएमा एप्पलले त्यसको स्क्यान गर्छ ।
त्यस्तो सामाग्री भएको प्रणालीले संकेत गरेपछि एप्पलमा कार्यरत व्यक्तिले त्यसलाई हेर्छन् । यदि बालबालिकाको अश्लिल सामाग्री भएको पुष्टी भएमा प्रयोगकर्ताको एकाउन्ट खारेज गरिन्छ भने शोषित र बेपत्ता बालबालिकाहरुका लागि राष्ट्रिय केन्द्रमा समेत सुचित गरिन्छ ।
छोराको नांगो तस्वीर मेडिकल प्रयोजनका लागि खिच्दा झन्झट
गतबर्ष डाक्टरको लागि आफ्नो बच्चाको नाङ्गो फोटो खिचेका एक पिता अमेरिकामा कानूनी झन्झटमा परेका थिए । सान फ्रान्सिस्कोमा बस्ने बुबा मार्कले आफ्नो छोराको लिंग सुन्निएको देखेपछि आफ्नो एन्ड्रोइड स्मार्टफोनबाट डाक्टरलाई पठाउनका लागि बच्चाको नांगो फोटो खिचेका थिए ।
कोराना महामारीको बेला भएकाले उनीहरुले भिडियो कलबाट परामर्श लिएका थिए । डाक्टरलाई स्वास्थ्य समस्याबारे थाहा पाउन सजिलो होस् भनेर नर्सले तस्बिरहरू पठाउन भनेकाले उनले बालकको गुप्तांगका तस्वीर खिचेका थिए । सुन्निएको स्पष्ट रुपमा देखाउने क्रममा उनीहरुको हात पनि तस्वीरमा आएको थियो ।
तस्बिरहरूको मद्दतमा, डाक्टरले समस्याको निदान गरे र एन्टिबायोटिकहरू दिए । जसले बालकलाई तुरुन्तै निको भयो । तर मार्क भने यो घटनाबाट धेरै ठूलो समस्यामा परे । उनी प्रहरी अनुसन्धानमा तानिए । उनी बाल यौन दुर्व्यवहार सामग्रीको आदानप्रदान गर्ने मानिसहरूलाई पासोमा पार्न डिजाइन गरिएको गुगलको एल्गोरिदमिक जालमा परे ।
४० वर्षका मार्कले जीमेल एकाउन्ट बनाएदेखि धेरै कुरामा गुगलमा भर पर्न थालेका थिए । उनको एन्ड्रोइड स्मार्टफोन क्यामेराले उनको फोटो र भिडियोहरू गुगल क्लाउडमा ब्याकअप गर्यो।
आफ्नो छोराको तस्बिर खिचेको दुई दिन पछि मार्कको फोनमा नोटिफिकेसन आयो । उनको एकाउन्ट हानिकारक सामग्रीको कारणले ब्लक गरिएको थियो जुन गुगलको नीतिहरूको गम्भीर उल्लङ्घन थियो । सम्भावित बाल यौन दुर्व्यवहार र शोषणमा गुगलले मार्कमाथि आशंका गरेको थियो ।
मार्कले कम्प्युटर प्रणालीले गल्ती गरेको र कम्प्युटरले गल्ती नगर्ने कुरा सुनिश्चित गर्नको लागि मानिस पनि हुने तथा त्यो व्यक्तिसमक्ष पुग्ने बित्तिकै उसको समस्या समाधान हुने ठानेका थिए ।
उनले आफ्नो छोराको संक्रमणको व्याख्या गर्दै गुगलको निर्णयको समीक्षा गर्न अनुरोध गर्दै फारम भरे। उनको एकाउन्ट बन्द हुँदा उनले कैयन महत्वपूर्ण दस्तावेजहरु गुमाउनुका साथै गुगल फोन नम्बरपनि गुमाएका थिए । गुगल फोन नम्बर गुमाउादा इन्टरनेट खाताहरूमा साइन इन गर्न आवश्यक सुरक्षा कोडहरू प्राप्त गर्न सकेनन् । जसले गर्दा उनको डिजिटल जीवन लक आउट भयो।
गुगलले उनलाई बाल यौन दुर्व्यवहार सामग्री घृणित भएको र आफूहरु यसलाई हाम्रो प्लेटफर्ममा फैलिनबाट रोक्न प्रतिबद्ध रहेको भन्दै जवाफ पठायो । मार्कले अपिल गरे । गुगलले एकाउन्ट पुनर्स्थापित नगर्ने भन्दै जवाफ पठायो ।
गुगलको समीक्षा टोलीले उनले बनाएको भिडियोलाई पनि फ्ल्याग गरेको थियो । सान फ्रान्सिस्को प्रहरीले मार्कबारे अनुसन्धान र खोजी गर्न थालेको थियो।
मार्कले सान फ्रान्सिस्को प्रहरीबाट एउटा चिठी पाए । जसमा उनीविरुद्ध यसमा छानबिन गरिएको र गुगल र उसको इन्टरनेट सेवा प्रदायकमा खोजी वारेन्ट पठाइएको प्रतिलिपिहरू समावेश भएको जानकारी दिइएको थियो। अनुसन्धानकर्ताले मार्कको गुगल एकाउन्टका सबै कुराको जानकारी सोधेका थिए । इन्टरनेट सर्च, स्थान इतिहास, मेसेज लगायत उनले गुगलमा स्टोर गरेका कागजात, फोटो र भिडियो समेत मागेका थिए ।
बाल शोषण सम्बन्धि भिडियोहरूबारे अनुसन्धान मार्कले छोराले फोटो खिचेको खिचेको एक हप्ता भित्र भएको थियो । मार्कले अनुसन्धानकर्ता निकोलस हिलार्डलाई फोन गरे । जसले केस बन्द भएको बताएका थिए ।
घटना अपराधसँग सम्बन्धित नभएको र कुनै अपराध नभएको प्रहरी अधिकारी हिलार्डले आफ्नो रिपोर्टमा लेखका थिए । गुगलले मार्कका सबै जानकारीहरूमा पुलिसको पहुँच दिएको थियो जसले बाल दुर्व्यवहार वा शोषण पुष्टी नगर्ने निर्णय गर्यो।
मार्कले पुलिस रिपोर्ट उपलब्ध गराएर गुगलमा आफ्नो एकाउन्ट प्राप्त गर्नका लागि पुनरावेदन गरे, तर कुनै फाइदा भएन। गुगलबाट उनले आफ्नो खाता सदाका लागि मेटाइएको सूचना पाए ।
टेक्सासमा पनि यस्तै घटना भयो
मार्कको समस्या सुरु भएको भोलिपल्ट टेक्सासमा उस्तै घटना भएको थियो । ह्युस्टनमा एक बच्चालाई उसको गुप्तांगमा संक्रमण थियो । बाल रोग विशेषज्ञको अनुरोधमा पिताले आफ्नो मोबाइलबाट फोटोहरू लिए । जुन फोटोहरू स्वचालित रूपमा ब्याकअप गरियो। त्यसपछि उनले गुगलको च्याट सर्भिस मार्फत फोटोहरु आफ्नी श्रीमतीलाई पठाए।
उनी एउटा घर किन्ने र अनगिन्ती डिजिटल कागजातहरूमा हस्ताक्षर गर्ने बीचमा थिए । त्यहीबेला उनको जीमेल खाता बन्द भयो। जसका कारण उनी निकै झन्झटमा परे ।
बाल पोर्नोग्राफी अपराधको बारेमा लेख्ने नर्थ क्यारोलिना विश्वविद्यालयका कानून प्रोफेसर कारिसा बायर्न हेसिकका अनुशार नग्न बालबालिकाका सबै तस्बिरहरू अश्लील, शोषणात्मक वा अपमानजनक हुँदैनन्। तर यौन दुर्व्यवहारयुक्त तस्वीरहरु कानुनी रूपमा परिभाषित गर्न जटिल हुन सक्छ।
मेडिकल प्रयोजनका तस्वीरहरु यौन दुर्व्यवहारयुक्त तस्वीरमा पर्दैनन् । किनभने यी गैर यौन कारणहरूको लागि लिइएको हेसिकको भनाई छ । बाल दुर्व्यवहार र उपेक्षासम्बन्धी अमेरिकी एकेडेमी अफ पेडियाट्रिक्स काउन्सिलका अध्यक्ष डा सुजेन ह्यानीले आमाबाबुलाई डाक्टरले निर्देशन दिए पनि आफ्ना बालबालिकाको गुप्तांगको फोटो नखिच्न सल्लाह दिएका छन् ।
यदि लिनैपर्ने अवस्था भएमा क्लाउडमा अपलोड गर्नबाट जोगिन र त्यस्ता तस्वीरहरु तुरुन्तै मेटाउन उनको सुझाव छ ।