Follow @khasokhasmag

शर्त हटाउन दिइएको आवेदन पेन्डिङ हुँदा २ बर्षे ग्रिनकार्डको अवधि अब थप ४ बर्ष लम्बिने


प्रकाशित मिति : माघ ९, २०७९ सोमबार

शर्त हटाउनका लागि दिइएको आवेदन पेन्डिङ हुँदा लगानी र विवाहका आधारमा प्राप्त २ बर्षे ग्रिनकार्डको अवधि युएससीआईएसले स्वत थप ४८ महिना लम्बाउने भएको छ । ग्रिनकार्डको शर्त हटाउन फाइल गरिएका आवेदनहरु आई ७५१ वा आई ८२९ का रिसिप्टले ४ बर्षसम्म स्टाटसको प्रमाणका रुपमा काम गर्ने युएससीआईएसले जनाएको छ ।

शर्त हटाउनका लागि दिइएको आवेदन पेन्डिङ रहेका लगानीमा आधारित शर्तसहितको ग्रिनकार्डको अवधि ४८ महिना लम्बिने प्रावाधन जनवरी ११ देखि लागु भइसकेको छ भने विवाहमा आधारित शर्तसहितको ग्रिनकार्डको अवधि स्वत ४८ महिना लम्बिने प्रावधान जनवरी २५ बाट लागु हुनेछ । युएससीआईएसले आई ७५१ वा आई ८२९ का रिसिप्टमा ४८ महिना लम्बिनेगरी भाषा समेत परिवर्तन गरेको छ ।

नयाँ आवेदनका सन्दर्भमा ४८ महिना लम्बिने व्यहोराको रिसिप्ट र पहिले नै आवेदन दिएका तर अहिलेसम्म पेन्डिङ अवस्थामा रहेकाहरुका सन्दर्भमा नयाँ रिसिप्ट पठाइने युएससीआईएसले जनाएको छ । त्यसैले विगतमा २४ महिना स्वत लम्बिने व्यहोराको रिसिप्ट पाएकाहरुले पनि नयाँ रिसिप्ट पाउनेछन् ।

यो रसिदका साथमा एक्सपायर भइसकेको वा हुन लागेको २ बर्षे शर्तसहितको ग्रिनकार्ड राखेको खण्डमा यसले सशर्त ग्रिनकार्डवाहकका रुपमा ४८ महिनासम्म वैध स्टाटस प्रमाणित गर्दछ । यी कागजातका आधारमा अमेरिकामा रोजगारका लागि योग्य रहेको प्रमाणित गर्न सकिनुका साथै विदेशको भ्रमण गरेर अमेरिका फर्कन समेत सकिन्छ ।

यदि कसैको शर्तसहितको २ बर्षे ग्रिनकार्ड पनि एक्सपायर भएको छ र शर्त हटाउनका लागि उचित तरिकाले फाइल गरिएको आई ८२९ वा आई ७५१ आवेदनको रिसिप्टको अवधि पनि एक्सपायर भएको छ भने यात्रा र रोजगारका लागि प्रमाणको रुपमा काम गर्नेगरी अवधि अझै थप्नका लागि युएससीआइएसको सम्पर्क केन्द्रमा फोन गर्न सक्नेछन् । त्यहाँ फोन गरेर फिल्ड अफिसमा अप्वाइन्टमेन्ट तय गर्न सकिनेछ ।

अप्वाइन्टमेन्टका बेलामा अध्यागमन अधिकारीले शर्तसहितको ग्रिनकार्डको कागजात जारी गर्न वा अस्थायी ग्रिनकार्डका रुपमा काम गर्ने छाप लगाउन सक्नेछन् । अधिकारीले आई ९४ फर्ममा वा म्याद नसकिएको पासपोर्टमा अस्थायी ग्रिनकार्डका रुपमा काम गर्ने आई ५५१ छाप लगाउन सक्नेछन् । यो छापका आधारमा अमेरिकामा काम गर्न वा अमेरिका बाहिर गएर आउन सकिनेछ ।

शर्तसहितको ग्रिनकार्डवाहक अमेरिका बाहिर एक वर्ष वा सोभन्दा बढी समयको लागि बस्ने योजना भएमा अमेरिका छोड्नु अघि फारम आई १३१ फाइल गरेर पुन प्रवेश अनुमतिको लागि आवेदन गर्नुपर्छ।

© 2022 KHASOKHAS®. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com