Follow @khasokhasmag

एसईईमा ३.८ जिपीए ल्याउने चेपाङ छात्रालाई प्लस टु पढ्न समस्या


प्रकाशित मिति : असार २६, २०७४ सोमबार

– प्रताप विष्ट

असार २६, २०७४- उनलाई विज्ञान बिषय लिएर कक्षा ११ मा भर्ना हुन मन छ । तर, खर्च नहुँदा पढ्नसक्ने सम्भावना छैन । एसईईमा ३ दशमलब ८ जिपिए ल्याउने मोनिका चेपाङको पीडा हो यो ।

हेटौडा उपमहानगरपालिका—१७ की १६ वर्षीया चेपाङ बाबु धनराजलाई साथमा लिएर सहयोगको निम्ति विभिन्न सरकारी,गैरसरकारी र दाताहरुको घरमा ढकढक्याउन पुगेकी छन्  ।

उनले स्थानीय रेडरोज विद्यालयबाट एसईई उत्तीर्ण गरेकी हुन् । उक्त विद्यालयले उनलाई नि:शुल्क पढाएको थियो ।

मकवानपुरमा २०७३ सालको एसईईको परीक्षामा ५ जना छात्रासहित १९ जना चेपाङ सफल भएका छन । तीमध्ये ‘ए प्लस’ जिपिए ल्याउने मोनिकामात्र एक हुन ।

मोनिकाको आमा मन्जु चेपाङले पनि विगतमा यस्तै नियति भोगे थिइन । मुलुककै चेपाङ समुदायको महिलामा सबै भन्दा पहिलो एसएलसी उत्तीर्ण गर्ने मन्जु हुन् । साविकको नामटार गाविसकी उनले २०४९ सालमा गाउँकै विद्यालयबाट एसएलसी उत्तिर्ण गरेकी थिइन् ।

उनले एसएलसी गर्दा मुलुकमा एक जना चेपाङ महिलाले पनि एसएलसी गरेका थिएनन् भने मुलुकभर २० जनामात्र चेपाङ पुरुषले एसएलसी गरेका थिए ।  आर्थिक अभावका कारणले मन्जुले पनि पढने ईच्छा पूरा गर्न पाइनन् । उनलाई अभिभावकले तत्कालै विवाह गरिदिए । विवाह गरेसँगै उनको पढ्ने चाहना टुंगियो ।

छोरीलाई पढाउने मञ्जुको तीव्र ईच्छा छ तर आर्थिक अभावका कारण छोरीलेपनि आफ्नै नियति भोग्नुपर्ला भन्ने चिन्ता उनमा छ ।

मन्जुका तीन छोराछोरी छन् । मोनिका जेठी छोरी हुन । अर्का एक छोरा र छोरी स्थानीय विद्यालयमा अध्ययनरत छन् ।

मोनिकाले हेटांैडास्थित हेटौडा स्कुल अफ म्यानेजमेन्ट र मकवानपुरको वहुमुखी क्याम्पसमा विज्ञान संकायमा अध्ययन गर्न फार्म भरेकी छन् ।

‘दुवै कलेजमा भर्ना हुन नाम निस्कन्छ तर भर्ना हुने पैसा छैन कसरी पढने ?’ उनले गहभरी आँशु पार्दै भनिन ‘गरिबको कोखमा जन्मेपछि मनभरी पढने इच्छा भएपनि पढन पाइदो रहेनछ ।’ एसईई गर्न सम्वन्धित वोर्डिङले सहयोग गरेको थियो भने शैक्षिक सामाग्री र विद्यालयको पोशाक वावु आमाले दैनिक ज्यालादारी गरेर जुटाउने गरेका थिए । दैनिक ज्यालादारी गरेर मोनिकाका अभिभावकले परिवारलाई पालन पोषण गर्दै आएका छन्  ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com