डिभीका लागि फोटो खिच्दा ब्याकग्राउण्ड कस्तो हुनुपर्छ ?
प्रकाशित मिति : कार्तिक २, २०७० शनिबार
डिभी भर्दा चाहिने फोटोका लागि ब्याकग्राउण्ड सेतो हुनुपर्छ । पूर्णरुपमा सेतो नभएको खण्डमा सेतोकोमात्रा अधिंकाश भएको तर हल्का खैरो, पँहेलो वा अन्य हल्का रंग मिसिएको सेतो ब्याकग्राउण्ड भएपनि हुन्छ ।
फोटो ६ महिनाभित्र खिचेको हुनुपर्छ । डिभीका लागि पेश गरिने फोटोकोे गुणस्तर र कम्पोजिशन पनि अमेरिकी भिसाका लागि पेश गरिने फोटोकै जस्तो हुनु पर्दछ ।
गत साल डिभीको आवेदनमा पेश गरिएको फोटो पुनः पेश गरेमा, मिलाइएको फोटो प्रयोग गरेमा वा तल उल्लेख गरिए अनुरूपका आवश्यकताहरू पूरा नभएको खण्डमा तपाईँ डिभीका लागि अयोग्य ठहरिनुहुनेछ ।
तपाईँको डिजिटल फोटो रङ्गिन, फोकस मिलेको, सादा सेतो वा हल्का रङ्गको पृष्ठभूमिमा खिचिएको, पूरा अनुहार देखिने गरी सिधा क्यामेरामा हेरी खिचिएको, अनुहारको अभिव्यक्ति निष्पक्ष भएको र दुवै आँखा खुला भएको, आफूले दिनदिनै लगाउने कपडामा खिचिएको हुनुपर्छ । चश्मा लगाएको हुनुहुँदैन ।
चालक अनुमतिपत्र वा अन्य सरकारी परिचयपत्रबाट प्रतिलिपि उतार गरिएका वा स्क्यान गरिएका फोटोहरू मान्य हुँदैनन् ।
स्न्यापशट, पत्रिकामा प्रकाशित फोटो, भेन्डिङ मेशिन वा मोबाइल फोनबाट खिचिएका कमसल गुणस्तरका फोटो वा पूर्ण–लम्बाइका फोटोहरू स्वीकार्य हुदैनन् ।
फोटो जेपीजी फरम्याटमा हुनु पर्दछ भने फोटोकोसाइज २४० किलोबाइट वा सोभन्दा कम हुनु पर्दछ । फोटोको लम्बाइ र चौडाइ बराबर हुनु पर्दछ भने डाइमेन्सन कम्तीमा ६०० पिक्सेल ६०० पिक्सेल हुनु पर्दछ ।
सानो बच्चाको फोटो खिच्दा फोटोमा अन्य कुनै व्यक्ति हुनुहुँदैन । बच्चाको आँखा खुला हुनु पर्दछ र बच्चाले क्यामेरातिर हेरेको हुनु पर्दछ । बच्चालाई सादा सेतो वा हल्का तन्नामा पिठ्युँ पछाडि पारेर सुताएर फोटो खिच्न सकिन्छ । यसले गर्दा बच्चाको टाउकोलाई आड पुग्छ र फोटोको लागि सादा पृष्ठभूमि पनि सुनिश्चित हुन्छ ।
बच्चा पल्टेकोले खास गरी माथिबाट फोटो खिच्नुपरेको अवस्थामा बच्चाको अनुहारमा छाया पर्न नदिनुहोस् । त्यस्तै कारको सिटलाई सादा सेतो वा हल्का रङको कपडाले छोपेर र बच्चालाई कारको सिटमा राखेर पनि फोटो खिच्न सकिन्छ । यसो गर्दा पनि बच्चाको टाउकोलाई आड मिल्दछ ।
अमेरिकी विदेश मन्त्रालयले जारी गरेको निर्देशिकामा आधारित ।