अमेरिका निवासी पूर्व मिस ब्युटिफूल श्यारोन शेर्पालाई आन्द्राको ‘स्टेज फोर क्यान्सर’
प्रकाशित मिति : असार १७, २०७९ शुक्रबार
अमेरिकाको शियाटल निवासी पूर्व मिस ब्युटिफूल श्यारोन शेर्पा आन्द्राको क्यान्सरबाट पीडित भएकी छिन् । क्यान्सर स्टेज फोर अवस्थामा रहेको र अगस्तको पहिलो साता पहिलो चरणको किमो थेरापी गरिएको छ ।
अप्रिलको दोश्रो साता पेट दुखेर अस्पताल जाँदा आन्द्राको क्यान्सर भएको पुष्टी भएको र कलेजोको केही भागमा समेत क्यान्सर फैलिएको उनको मेडिकल रिपोर्टमा उल्लेख छ । उनको शियाटलमा रहेको स्वीडिस मेडिकल सेन्टरमा उपचार भइरहेको छ ।
आफूमा क्यान्सरलाई जित्ने आत्मविश्वास रहेको र छिट्टै सामान्य अवस्थामा फर्किने आशा रहेको श्यारोन शेर्पाले खसोखासलाई बताइन् । मनिषा कोइरालाले जस्तै आफूले पनि क्यान्सरलाई जीतेर सामान्य जीवनमा फर्कने उनले आत्मविश्वास व्यक्त गरिन् । उनले भनिन् – ‘डाक्टरहरुको उपचार, सबैको माया र प्राथनाले क्यान्सरलाई छिट्टै जित्ने आत्मविश्वास पलाएको छ ।’
दोर्जी छिरिङ शेर्पा र अन्जु गुरुङका तीनमध्येकी जेठी छोरी श्यारोन काठमाडौंमा जन्मिएकी हुन् । उनकी कान्छी बहिनी सराहको सन् २०१० विमान दुर्घटनामा निधन भएको थियो । सराहले उक्त विमानमा परिचारिकाका रुपमा काम गर्दै आएकी थिइन् । श्यारोनकी आमाको पनि सन् २०१४ मा निधन भएको थियो । आफूले जीवनमा यस्ता पीडादायक क्षणहरुलाई पनि पार गरेको र अहिलेको पीडालाई पनि झेल्ने साहस आफूमा रहेको श्यारोनले बताइन् ।
बाल्यकालमा दार्जिलिंगको सनसाइन स्कुलमा अध्ययन गरेकी श्यारोनले काठमाडौंको कान्तिपुर ईंग्लिस हाइस्कुलबाट एसएलसी उत्तिर्ण गरिन् । उनले चोभारमा रहेको मोर्डन इन्डियन स्कुलबाट १२ कक्षाको अध्ययन पूरा गरिन् भने कलेजमा अध्ययनरत रहेको बेला सन् १९९६ को मिस ब्यूटिफूलमा भाग लिएर मिस ब्यूटिफूलको उपाधी पनि जितिन् । उनले त्यतीबेला मिस मिस क्याटवाकको उपाधी पनि जितेकी थिइन् ।
त्यसपछि उनलाई कैयन चलचित्र, विज्ञापन र मोडलिङका लागि अफरहरु आए । कान्तिपुर एफएममा उनी लोकप्रिय रेडियो प्रस्तोता समेत भइन् । नेपालमा किंगफिसर वियर सुरुगर्दा कार्यक्रम संचालन गरेकी उनले सन् १९९८ मा महाशिवरात्री म्युजिक फेस्टिवलको समेत संचालन गरेकी थिइन् । उनले भिजिट नेपाल १९९८ मा र्याम्प मोडलिङ समेत गरिन् । वेभ म्यागाजिन, कोकाकोला, चौधरी ग्रुपको रियल गोल्ड वियरमा समेत मोडलिङ गरेकी उनीसँग चलचित्रमा समेत अभिनय गरेको अनुभव छ ।
उनले गगन विरही निर्देशित शिखर चलचित्रमा नायक श्रृकृष्ण श्रेष्ठसँग मुख्य भूमिकामा अभिनय गरिन् भने चलचित्र चमत्कारमा राजेश हमालसँग अभिनय गरिन् । उनले चलचित्र अंगालो अंगालोमा पनि अभिनय गरेकी थिइन् । तिम्रो आगमनले बोलमा गीतमा उनले रामकृष्ण ढकालसँग अभिनय गरिन् । उनले लुम्बिनी एयरवेज, स्काइलाइन एयरवेज र गोरखा एयरवेजमा पनि काम गरिन् भन् नेपाली टेलिभिजनमा कार्यक्रम संचालनको अनुभव समेत रहेको छ ।
त्यसपछि जापान गएकी उनले त्यहाँ र्याडिसन होटलमा काम गरिन् । जापानमा उनले कैयन कार्यक्रमहरुमा नेपाली नृत्य समेत प्रस्तुत गरिन् । जापानबाट अमेरिका आएकी श्यारोन मिस नेपाल अमेरिका २०११ मा सहभागी संयोजक र कोरियोग्राफर थिइन् । उनले सन् २०१२ मा न्युयोर्कबाट संचालित ह्वाइट हिमाल टेलिभिजनमा समेत कार्यक्रम संचालन गरिन् । अमेरिकाको क्यालिफोर्नियामा रहँदा उनले प्यासेफिक प्लाजा होटलमा फ्रन्ट डेस्कमा काम गरिन् भने नेपाली रेष्टुरेण्टमा समेत काम गरिन् । सन् २०१७ मा सुरक्षा पोजिशनमा काम गर्नेगरी पोर्टल्याण्ड बसाई सरेकी उनको सन् २०२० को कोरोना महामारी सुरु हुनुभन्दा ठीक अगाडि सोसल सेक्युरिटी कार्ड, बैंक कार्ड, पासपोर्ट लगायतका कागाजातहरु चोरी भए ।
त्यसपछि श्यारोनको जीवनमा निकै कठिन क्षणहरु आए । कागजपत्रहरु हराएपछि काम नपाउने अवस्था आएको र आफू पोर्टल्याण्डको सडकमा बस्ने अवस्था आएको श्यारोनको अनुभव छ । त्यसपछि उनी शियाटलमा बसाई सरिन् । त्यहाँ उनले पत्रिका बेच्ने भेण्डरका रुपमा काम गर्न थालिन् । यो काम गर्दा आफ्नो मालिक आफै भएको र कसैको तालिकामा काम गर्नु पर्ने अवस्था नरहेको उनले बताइन् ।
शियाटलमा उनले ह्वील, साल्भेशन आर्मी र सेन्ट जेम्स क्याथेड्रल लगायतका शेल्टरहरुमा समय विताउने क्रममा उनमा धेरै प्रभाव पर्यो । सडकमा रहेकाहरुका लागि आफूले खाना पकाएर दिने गरेको र उनीहरुमा असलपन देख्ने गरेको उनले बताइन् । पछिल्लो समय उनको जीवनमा सुधार हुँदै गइरहेको थियो । उनी दक्षिण शियाटलमा एउटा सानो घरमा बस्न सुरु गरेकी थिइन् । तर यही बेला श्यारोनमा आन्द्राको क्यान्सर देखिएको छ ।
आफूमा क्यान्सर देखिएपनि नआत्तिएको र धैर्यताका साथ उपचारको प्रकृयामा रहेको उनले बताइन् । तर पनि उनको अनुहारको हाँसो भने हराएको छैन । उनले हास्दै भनिन् ‘म छिट्टै निको हुनेछु । र फेरी न्युयोर्कमा दालभात खान आउनेछु ।’