३० हजार डलरसम्म लिएर ग्रिनकार्डका लागि सयौं नक्कली विवाह गराउने ११ जना पक्राउ
प्रकाशित मिति : चैत्र २७, २०७८ आईतबार
३० हजार डलरसम्म लिएर ग्रिनकार्डका लागि सयौं नक्कली विवाह गराउने ११ जनाविरुद्ध अमेरिकामा मुद्दा दायर गरिएको छ । संघीय अभियोजनकर्ताहरुले उनीहरुबिरुद्ध मुद्दा दायर गरेका हुन् ।
विवाहको बैधता सम्बन्धि प्रावधानबाट समेत उन्मुक्ति पाउन कतिपय आवेदनमा आफ्ना ग्राहकहरु घरेलु हिंशाका शिकार भएको समेत उनीहरुले उल्लेख गरेको जनाइएको छ । घरेलु हिंशाको शिकार भएको देखाएर दम्पत्तिको सहमतिविना नै ग्रिनकार्ड फाइल गर्ने वातावरण बनाएको अदालतमा पेश गरिएको कागजातमा जनाइएको छ ।
उनीहरुले नक्कली विवाहको धन्दा सन् २०१६ को अक्टोबरदेखि सुरु गरेको जनाइएको छ । यसको खुलासा भने गत महिनामात्र भएको थियो । त्यसपछि गत बिहिबार उनीहरु पक्राउ परेका थिए ।
एघारमध्ये ६ जना फिलिपिनोहरु रहेको र लस एन्जसलमा बस्दै आएको जनाइएको छ । त्यस्तै एकजना ब्राजिलियन रहेको र अरु सबै अमेरिकी नागरिक रहेको जनाइएको छ ।
उनीहरुले झण्डै ४ सयजना ग्राहकबाट लाखौं डलरक आम्दानी गरेको अभियोजनकर्ताहरुको दावी छ । उनीहरुले अमेरिकाको अध्यागमन कानूनको दुरुपयोग गरेको दावी अदालतको कागजातमा गरिएको छ ।
हरेकविरुद्ध नक्कली विवाह र अध्यागमन जालसाजीको मुद्दा दायर गरिएको छ । दोषी ठहर भएको खण्डमा ५ बर्ष कैद, ३ बर्ष निगरानीमा रिहा र साढे २ लाख डलरसम्म जरिवाना हुनसक्नेछ ।