विगतमा देशनिकालाको आदेश पाएका निश्चित टीपीएसवाहकले ग्रिनकार्ड आवेदन दिनपाउनेबारे स्पष्ट
प्रकाशित मिति : चैत्र २२, २०७८ मंगलबार
विगतमा देशनिकालाको आदेश पाएका निश्चित टीपीएसवाहकले देशनिकाला खारेज गराउन पाउने र ग्रिनकार्डका लागि आवेदन दिनसक्नेबारे युएससीआईएसले स्पष्ट पारेको छ । विगतमा देशनिकालाको आदेश पाएका तर टीपीएसमा भएको बेलामा एड्भान्स परोल लिएर अमेरिकाबाहिर गएर आएकाहरुले यो सुविधा पाउनेछन् ।
तर तपाईले विगतमा पाएको देशनिकालाको आदेशका कारण तपाईको स्टाटस समायोजनको आवेदनमा युएससीआईएसको क्षेत्राधिकार हुनुहुँदैन । यस्तो अवस्थाका व्यक्तिको ग्रिनकार्ड वा स्टाटस समायोजन आवेदन दिने आशय भएमा वा आवेदन दिएको भएमा वा युएससीआईएसको क्षेत्राधिकार नभएको भन्दै आवेदन अस्वीकृत भएको भएमा उनीहरुले आइसको कार्यालयमा प्रमुख कानुनी सल्लाहकार समक्ष देशनिकालाको आदेश खारेज गराउने प्रकृया पुन खोल्ने संयुक्त प्रस्तावमा सहभागी हुनका लागि अनुरोध गर्नसक्छन् ।
यदि आवेदकले पहिले नै युएससीआईएस समक्ष स्टाटस समायोजन वा ग्रिनकार्डका लागि आवेदन दिएको तर क्षेत्राधिकार नभएका कारणमात्र वा क्षेत्राधिकार नभएको र विगतको देशनिकालाको आदेशमात्र आवेदन अस्वीकृत भएको खण्डमा आवेदकको विगतको देशनिकालाको आदेश खारेज हुने युएससीआईएसले जनाएको छ । त्यस्ता आवेदकहरुले नयाँ ग्रिनकार्ड आवेदन आई ४८५ फाइल गन वा पहिले फाइल गर्दा अस्वीकार भएको आवेदन पुन खोल्ने आई २९० बी आवेदन पेश गर्नसक्नेछन् ।
यसरी फाइल गर्दा आई २९० बी आवेदनको पहिलो पेजको सुरुमा नै टीपीएस रिमुभल अर्डर लेख्न युएससीआईएसले सुझाव दिएको छ । यस्तो लेखेको खण्डमा आवेदन पहिचान गर्न युएससीआईएसका अधिकारीलाई सहज हुने र समयमा फाइल नगरेको भन्दै अस्वीकृत हुने सम्भावना नहुने जनाइएको छ । युएससीआईएसले ती टीपीएसवाहकका तोकिएको समय नाघिसकेका आवेदनहरु समेत स्वीकार गर्ने स्पष्ट पारेको छ ।