अमेरिकामा रहेका अन्तर्राष्ट्रिय विद्यार्थीले कस्ले ट्याक्स फाइल गर्नुपर्छ? कस्ले पर्दैन ?
प्रकाशित मिति : चैत्र २०, २०८० मंगलबार
अमेरिकामा रहेका अन्तर्राष्ट्रिय विद्यार्थीले पनि ट्याक्स फाइल गर्नुपर्छ । अमेरिकामा अस्थायीरुपमा आएका विद्यार्थीहरु, प्रशिक्षार्थी, विद्वानहरु, अनुसन्धानकर्ताहरु, एक्सचेन्ज भिजिटर लगायतले पनि निश्चित मापदण्डभित्र परेको खण्डमा ट्याक्स फाइल गर्नुपर्ने आईआरएसले जनाएको छ ।
विद्यार्थी लगायतका गैरआवासीय व्यक्तिका लागि कतिसम्म आम्दानी हुनेले ट्याक्स फाइल गर्नुपर्छ भन्ने कुनै मापदण्ड छैन । आईआरएसका अनुशार स्कलरसिप वा फेलोसिपबापत कर लाग्ने रकम प्राप्त गरेकाहरु वा अन्य कुनै प्रकारको कर लाग्ने आम्दानी गरेकाहरुले कर तिर्नुपर्छ । त्यस्तै ओपीटी र सीपीटीबाट आम्दानी गरेका विद्यार्थीहरुले पनि कर तिर्नु पर्ने हुन्छ।
तर विदेशी श्रोतबाट मात्र आम्दानी गरेकाहरु र अमेरिकाको बैंक, बित्तिय संस्था वा इन्सुरेन्सबाट ब्याज प्राप्त गरेका अन्तर्राष्ट्रिय विद्यार्थी वा गैर आवासीय व्यक्तिहरुले भने अमेरिकामा ट्याक्स फाइल गर्नु पर्दैन । त्यस्तै ट्याक्स नलाग्ने फेलोसिप वा स्कलरसिप पाएकाहरुले पनि ट्याक्स फाइल गर्नु पर्दैन ।
अमेरिकामा आम्दानी गरेका धेरै जसो अन्तर्राष्ट्रिय विद्यार्थीहरूलाई सोसल सेक्युरिटी र मेडिकेयर करहरूबाट छुट दिइन्छ। उनीहरुले यस्तो छुट अमेरिका आएको ५ बर्षसम्म प्राप्त गर्न सक्छन् ।
विद्यार्थी लगायतका गैर आवासीय व्यक्तिले १०४० एनआर वा १०४० एनआर ईजी फर्म भरेर आईआरएसमा ट्याक्स फाइल गर्नुपर्छ । तर उनीहरुले आवासीय व्यक्तिले भने १०४० फर्म भने भर्न नहुने आईआरएसले चेतावनी दिएको छ ।
यदि अमेरिकामा रहेका विद्यार्थीहरुले कुनै आम्दानी नगरेको भएतापनि उनीहरुले आईआरएसमा फर्म ८८४३ भरेर बुझाउनुपर्छ । त्यसका लागि डेडलाइन जुन १५, २०२४ सम्म हो ।
यदि अमेरिकामा आम्दानी पनि गरेको छ भने अप्रिल १५ भित्र फर्म ८८४३ का साथमा टयाक्स रिटर्न फर्म १०४० एनआर पनि पठाउनुपर्छ । यदि आम्दानी गरेको छैन भने जुन १५ भित्र फर्म ८८४३ मात्र भरेर पठाएपुग्छ ।
आईआरएसले १०४० एनआर प्रशोधन गर्न २१ दिनसम्म लगाउँछ भने रिफण्ड पाउने अपेक्षा गरेकाहरुले रिफण्ड पाउन ६ महिनासम्म लाग्नसक्छ ।
तर अन्तर्राष्ट्रिय विद्यार्थीहरुले १०९८ टी नामको ट्युसन स्टेटमेन्ट भने भर्नु पर्दैन । यो ट्युसन स्टेटमेन्ट केबल अमेरिकी नागरिक वा ग्रिनकार्डवाहकका लागिमात्र हो ।
विभिन्न कुराहरुले तपाईंको फाइलिङ आवश्यकताहरूलाई असर गर्न सक्छ। त्यसैले आफ्नो अवस्थाको विशेष मार्गदर्शनका लागि व्यवसायिक कर पेशेवर वा आईआरएससंग परामर्श गर्नुपर्छ ।