कतै तपाईको ट्याक्स रिफण्ड पाउनुपर्नेभन्दा कम त भएन? यस्ता हुनसक्छन् कारण
कहिलेकाँही उचित क्रेडिटहरु दावी गर्न छुटाएका कारण तपाईले पाउनुपर्नेजति ट्याक्स रिफण्ड वा क्रेडिट नपाएको अवस्था पनि हुनसक्छ । त्यसैले आफूहरु सबै प्रकारका क्रेडिटका लागि योग्य भए नभएको जाँचेरमात्र वा जानकारी हासिल गरेरमात्र ट्याक्स फाइल गर्नुहोला । नत्र तपाइईको रिफण्ड रकम तपाईले पाउनुपर्ने रकमभन्दा कम हुनसक्छ ।
तपाईले यी क्रेडिटहरु दावी गर्न त छुटाउनुभएन ?
राहत चेक दावी
अमेरिकामा कोरोनाको महामारीका कारण पहिलो र दोश्रो चरणको राहत चेकका लागि योग्य भएका तर कुनै कारणवश राहत चेक प्राप्त गर्न नसकेकाहरुले ट्याक्स फाइल गर्दा उक्त रकमको क्रेडिट प्राप्त गर्छन् ।
सन् २०२१ मा जन्मिएको बच्चाका लागि पनि थप १४ सय डलरको राहत चेक दावी गर्न सकिन्छ । तर उक्त बच्चाको विवरण ट्याक्स फाइल गर्दा समावेश गर्नुपर्छ ।
रकम प्राप्त गर्नका लागि तपाईले रिफण्डयुक्त रिकभरी रिबेट क्रेडिट दावी गर्नुपर्छ । त्यसपछि तपाईले रिफण्ड प्राप्त गर्नुपर्ने अवस्था भएमा उक्त रकम रिफण्डमा जोडिएर प्राप्त हुन्छ । ट्याक्स तिर्नुपर्ने अवस्था भएमा उक्त रकम घटाएर ट्याक्स रकम कम बनाइनेछ । यदि तपाईले आईआरएसलाई तिर्नुपर्ने रकमको तुलनामा राहतको रकम धेरै भएमा भने बाँकी रकम रिफण्डका रुपमा प्राप्त हुनेछ ।
अर्नड इन्कम ट्याक्स क्रेडिट
तपाईले अर्नड इन्कम ट्याक्स क्रेडिट दावी गर्न छुटाउनुभएको त छैन ? विगतका बर्षहरुमा योग्य नभएकाहरु पनि अर्नड इन्कम ट्याक्स क्रेडिटका लागि पनि योग्य हुनसक्ने सम्भावना रहन्छ ।
सन् २०२१ को ट्याक्स फाइल गर्नेहरुमा बच्चा नभएका कम आम्दानी भएकाहरुले १५ सय डलरसम्मको क्रेडिट प्राप्त गर्नेछन् जुन सन् २०२० को तुलनामा झण्डै तेब्बर हो । गतबर्ष अमेरिकी राष्ट्रपति जो बाइडेनले हस्ताक्षर गरेको १ दशमलव ९ बिलियन डलरको अमेरिकन रेस्क्यु प्लानमा क्रेडिट विस्तार गर्नुका साथै आम्दानीको मापदण्ड बढाइएको थियो ।
तपाई २०२१ को आम्दानीले योग्य नभएपनि २०१९ को आम्दानी प्रयोग गरेर समेत यो क्रेडिट दावी गर्न सक्नुहुनेछ । तपाईले जुन बर्षको आम्दानी छनौट गर्दा धेरै रकम पाउनुहुनेछ, त्यो बर्षको आम्दानी छनौट गर्न सक्नुहुनेछ ।
चाइल्ड ट्याक्स क्रेडिट
तपाईले चाइल्ड ट्याक्स क्रेडिट वापतको रकम २०२१ मा पाउनुभएको छैन वा पूरै रकम पाउनुभएको छैन भने यो रकम ट्याक्स फाइल गर्दा दावी गर्नुहोला । प्रत्येक बच्चाको २ हजार डलरको साटो अधिकतम ३६ सय डलरसम्म प्राप्त हुनेछ । तर तपाईको बच्चा जति बढी उमेरको छ वा तपाईले जति धेरै आम्दानी गर्नुहुन्छ तपाईले प्राप्त गर्ने रकम पनि कम हुनेछ । तपाईको बच्चा २४ बर्षभन्दा कम उमेरकोे डिपेन्डेन्टका रुपमा रहेको छ भने पनि कलेज उमेरका डिपेन्डेन्टका लागि समेत यसबापात केही रकम प्राप्त हुनसक्नेछ ।
बच्चाका सन्दर्भमा प्राप्त गर्ने रकम आम्दानी र बच्चाको संख्यामा भर पर्छ । यदि तपाईको बार्षिक आम्दानी एकल कर फाइल गर्नेको सन्दर्भमा ७५ हजार वा त्योभन्दा कम, घरमुलीका रुपमा फाइल गर्नेको सन्दर्भमा १ लाख १२ हजार ५ सय वा त्योभन्दा कम र संयुक्त रुपमा फाइल गर्ने दम्पत्तिका सन्दर्भमा १ लाख ५० हजार डलर वा त्योभन्दा कम रहेको छ भने तपाईले चाइल्ड ट्याक्स क्रेडिटको पूरै रकम पाउनुहुनेछ । तर उक्त थ्रेसहोल्डभन्दा माथि आम्दानी छ भने हरेक १ हजार बढी आम्दानीका लागि चाइल्ड ट्रयाक्स क्रेडिट रकम ५० डलरले घट्दै जानेछ ।
नयाँ बच्चा जन्मेको भएमा वा बैवाहिक स्थीतिमा परिवर्तन भएको भएमा तपाईले यसको जानकारी दिएर क्रेडिट प्राप्त गर्न सक्नुहुनेछ । सन् २०२१ को मे १७ अगाडि सोसल सेक्युरिटी जारी भएको बच्चाका सन्दर्भमा यो क्रेडिट प्राप्त हुनेछ ।
बाल हेरचाह खर्च
तपाईले बाल हेरचाह खर्च दावी गर्न सक्नुहुनेछ । यसका लागि ट्याक्स फाइल गर्दा २ जनाको १६ हजार डलसम्म ट्याक्स क्रेडिट पाइन्छ । तर तपाईले काम गरेर बच्चाको हेरचाहका लागि अरुलाई रकम तिरेको हुनुपर्छ । विगतमा दुईजनाको ६ हजार डलरसम्ममात्र ट्याक्स क्रेडिट पाइने नियम रहेको थियो । एकजनाको हकमा भने अधिकतम ८ हजार डलरसम्म पाइनेछ । विगतमा ३ हजारडलरसम्म पाउने प्रावधान थियो ।
बालबालिका र आश्रितहरुको हेरचाहको ट्याक्स क्रेडिटबारे २०२१ मा धेरै तरिकाबाट विस्तार गरिएकाले धेरै परिवारहरुले यसपटक विगतको तुलनामा धेरै ट्याक्स क्रेडिट प्राप्त गर्नेछन् । विगतमा यस्तो ट्याक्स क्रेडिटका लागि योग्य नभएकाहरु समेत यसपटक योग्य हुनसक्ने जनाइएको छ ।
यदि तपाईको बच्चाको हेरचाहका लागि तपाईले कसैलाई रकम तिर्नुभएको छ भने तपाईले एकजना बच्चाको ८ हजार डलरसम्म क्रेडिट दावी गर्न सक्नुहुनेछ । डेकेयर वा अन्य व्यक्तिलाई तिरेको रकमका सन्दर्भमा यस्तो क्रेडिट प्राप्त गर्न सकिनेछ ।
यीबाहेक तपाईले ट्याक्समा घटाउन मिल्ने अन्य कैयन खर्चहरु हुनसक्छन्, त्यसका लागि ट्याक्स फाइल गरिदिने व्यक्तिलाई सोध्न नबिर्सनुहोला ।
