अमेरिकाको अध्यागमन अदालतमा १५ लाख मुद्दा पेन्डिङ, नेपालीका मात्रै ४ हजार
प्रकाशित मिति : माघ ११, २०७८ मंगलबार
अमेरिकाको अध्यागमन अदालतले अहिलेसम्मकै सबैभन्दा ठूलो ब्याकलगको सामना गर्नुपरेको छ । पछिल्लो रिपोर्ट अनुशार अमेरिकी अध्यागमन अदालतमा पेन्डिङ मुद्दाको संख्या १५ लाख नाघेको छ । डिसेम्बरको अन्तिममा पेन्डिङ मुद्दाको संख्या १५ लाख ९६ हजार १ सय ९३ पुगेको थियो ।
अदालतमा अध्यागमनबारेका मुद्दा पेन्डिङ रहेकाहरुको संख्या अमेरिकाको छैठौं सबैभन्दा ठूलो सिटी फिलाडेल्फियाको जनसंख्या भन्दा धेरै भएको छ । सन् २०२१ को अक्टोबरदेखि डिसेम्बरसम्मको पेन्डिङ मुद्दाको बृद्धि कुनै पनि तीनमहिनाको तुलनामा इतिहासमै सबैभन्दा धेरै भएको छ । यो अवधिमा मुद्दाको ब्याकलग १ लाख ४० हजारभन्दा धेरैले बढेको थियो ।
नेपालीका मात्र ४ हजारभन्दा धेरै मुद्दाहरु अध्यागमन अदालतमा पेन्डिङ अवस्थामा रहेका छन् । विश्वकै देशहरुमा सबैभन्दा धेरै अध्यागमन मुद्दा अमेरिकाको अदालतमा पेन्डिङ रहेकाहरुमा नेपाल २३ औं नम्बरमा रहेको छ । सबैभन्दा धेरै न्युयोर्कको अदालतमा २१२० मुद्दा पेन्डिङ रहेका छन् । न्युयोर्क सिटीको मुख्य अदालतमा मात्र १७९६ नेपालीका मुद्दा पेन्डिङ छन् । ब्रोडवेमा २०१ र भेरिक स्ट्रीटमा ११८ नेपालीका मुद्दा पेन्डिङ छन् ।
क्यालिफोर्नियाका अदालतमा १०६४ नेपालीका अध्यागमन सम्बन्धि मुद्दाहरु पेन्डिङ अवस्थामा रहेका छन् । त्यसपछि टेक्सासमा ३७८, मासाचुसेट्समा ९९, मेरिल्याण्डमा ९०, भर्जिनियामा ७४, कोलोराडोमा ४०, न्युजर्सीमा ३५, इलिनोयमा २४, पेन्सिलभेनियामा १७, मिनेसोटामा १६, वासिंटनमा १५, जर्जियामा १४ नेपालीका मुद्दा पेन्डिङ रहेका छन् ।